புதிய ஆளுநருக்கு ஸ்டாலின் வாழ்த்து

புதிதாக நியமிக்கப்பட்டுள்ள தமிழக ஆளுநர் பன்வாரிலால் புரோஹித்துக்கு திமுக செயல்தலைவர் மு.க.ஸ்டாலின் வாழ்த்து தெரிவித்துள்ளார். 

திமுக செயல் தலைவர் மு.க.ஸ்டாலின் வெளியிட்டுள்ள அறிக்கையில், சட்டமன்றத்திலும் மாநிலத்தின் பொதுநலன்களை பாதிக்கக்கூடிய பல்வேறு நெருக்கடிகள் ஏற்பட்டுள்ள நேரத்தில், தமிழகத்திற்கு பெறுப்பு ஆளுநர் மட்டுமே நியமிக்கப்பட்டு இருந்ததால் மாநில அரசு நிர்வாகத்தின் ஸ்திரத்தன்மை சிதைக்கப்பட்டு அனைத்து துறைகளிலும் தமிழகத்தின் முன்னேற்றம் தேக்க நிலைக்கு வந்துவிட்டதாக குறிப்பிட்டுள்ளார். 234 சட்டமன்ற உறுப்பினர் பலம் கண்ட தமிழக சட்டமன்றத்தில் 113 உறுப்பினர்களின் ஆதரவுதான் உள்ளது என தேர்தல் ஆணையத்தில் முதலமைச்சர் அணி சார்பில் பிரமாண வாக்குமூலம் தாக்கல் செய்துள்ள இந்த நேரத்தில் பதவியேற்கும் புதிய ஆளுநர் அரசியல் சட்டம் அளித்துள்ள பொறுப்புகளையும், கடமைகளையும் தமிழக மக்களின் நலன் கருதி சுதந்திரமாகவும், நடுநிலையோடும் நிறைவேற்றுவார் என நம்புவதாகக் கூறியுள்ளார்.