Published : 25,Sep 2017 11:23 AM
கலகலப்பு 2-ல் ஓவியாவுக்கு இடமில்லை
கலகலப்பு பார்ட் 2 எடுக்க இருப்பதாக தனது ட்விட்டர் பக்கத்தில் நடிகை குஷ்பு அறிவித்துள்ளார்.
சுந்தர் சி இயக்கத்தில் 2012ல் வெளியான படம் கலகலப்பு. காமெடி வகையான படங்களில் அதிக வசூலை அள்ளிய படம் என்ற பேரை இது சம்பாதித்தது. இந்தப் படத்தை டிரெண்ட் ஆக்கி பல படங்கள் வெளி வந்தன. இதில் சிவா, விமல், அஞ்சலி, ஓவியா, சந்தானம் என பலர் நடித்திருந்தனர். இதன் வெற்றியை மனதில் கொண்டு பார்ட் 2 எடுக்கும் முயற்சியில் இறங்கியிருக்கிறார் படத்தின் தயாரிப்பாளர் குஷ்பு.
அப்படி பார்ட் 2 எடுக்கப்பட்டால் அதில் ஓவியா இருப்பாரா என எதிர்பார்ப்பு இருந்தது. பிக் பாஸ் நிகழ்ச்சிக்குப் பின் அவரது மார்க்கெட் அளவு உயர்ந்ததே எதிர்பார்ப்புக்கான முக்கிய காரணம். கலகலப்பு காமெடி வெற்றிக்கு சந்தானமும் முக்கிய காரணம். அவர் தற்சமயம் ஹீரோவாக களம் இறங்கிவிட்டார். பெரிய ஹீரோக்கள் படங்களில் கூட அவர் காமெடி ரோலில் நடிப்பதில்லை.
இந்நிலையில் குஷ்பு அறிவித்துள்ள கலகலப்பு 2 பட்டியலில் ஜீவா, ஜெய் முக்கிய கதாபாத்திரங்களில் நடிக்கின்றனர். நிக்கி கல்ராணி, கேத்ரின் தெரஸா நாயகிகளாக ஒப்பந்தம் செய்யப்பட்டுள்ளனர். சுந்தர் சி இயக்கும் இப்படத்திற்கு அவரது ஃபேவரைட்ஸ் இசையமைப்பாளர் ஹிப்ஹாப் தமிழா ஆதி இசையமைக்கிறார். அடுத்த மாதம் அக்டோபரில் படப்பிடிப்புக்கான வேலைகள் ஆரம்பமாக உள்ளன.
