முன்னாள் அமைச்சர் செந்தில் பாலாஜியின் உறவினர் வீடுகளில் ரூபாய் 50 கோடி மதிப்பிலான பினாமி சொத்துகள் பறிமுதல் செய்யப்பட்டுள்ளன.

டிடிவி தினகரன் ஆதரவாளர்களில் முக்கியமானவரான செந்தில் பாலாஜி, போக்குவரத்துத்துறை அமைச்சராக இருந்தபோது, அந்தத் துறையில் வேலை வாங்கித் தருவதாகக் கூறி நான்கு கோடியே 25 லட்ச ரூபாய் மோசடி செய்ததாக எழுந்தது. இந்த புகாரின் அடிப்படையில் செந்தில் பாலாஜியின் உறவினர், நண்பர்கள் வீடுகளில் கடந்த இரண்டு நாட்களாக வருமான வரி சோதனை நடைபெற்றது. இந்நிலையில் இன்று மூன்றாவது நாளாக காலை 10 மணியிலிருந்து சோதனை நடைபெற்று வருகிறது. இதில் 1.20 கோடி ரூபாய் பறிமுதல் செய்யப்பட்டுள்ளது. மேலும் ரூபாய் 50 கோடி மதிப்பிலான பினாமி சொத்துகளும் வருமான வரி சோதனையில் சிக்கியதாக தகவல் வெளியாகி உள்ளது. இதுதவிர ஏராளமான ஆவணங்களும் கைப்பற்றப்பட்டுள்ளன. சோதனை மேலும் தொடரும் என்றும் கூறப்படுகிறது.