சீர்காழி: தொடர் இருசக்கர வாகன திருட்டில் ஈடுபட்டதாக இளைஞர் கைது

சீர்காழி சுற்றுவட்டார பகுதிகளில் இருசக்கர வாகன திருட்டில் ஈடுபட்ட இளைஞர் கைது செய்த போலீசார் 6 இருசக்கர வாகனங்களை பறிமுதல் செய்தனர்.

மயிலாடுதுறை மாவட்டம் சீர்காழி, கொள்ளிடம் சுற்றுவட்டார பகுதிகளில் இருசக்கர வாகனங்கள் திருட்டு நடைபெற்று வந்தது. இதுதொடர்பான தொடர் புகாரின் பேரில் சீர்காழி சரக போலீசார் தீவிர விசாரணை மேற்கொண்டு வந்தனர். இந்நிலையில் கொள்ளிடம் காவல் நிலைய போலீசார் வழக்கம் போல் வாகன சோதனையில் ஈடுபட்டிருந்தனர்.

அப்போது அவ்வழியே இருசக்கர வாகனத்தில் வந்த நபரை சந்தேகத்தின் பேரில் நிறுத்தி சோதனை செய்தனர். விசாரணையில் அவர், சீர்காழி திருக்கோலக்கா தெருவைச் சேர்ந்த வாசுதேவன் (22) என்பதும் அவர் ஓட்டி வந்த இருசக்கர வாகனம் திருட்டு வாகனம் என்பதும் தெரியவந்தது.

இதனையடுத்து வாசுதேவனை கைது செய்த கொள்ளிடம் போலீசார், அவரிடம் தீவிர விசாரணை மேற்கொண்டனர். அவர் கொடுத்த தகவலின் பேரில் திருடி மறைத்து வைத்திருந்த ஆறு இருசக்கர வாகனங்களை மீட்ட போலீசார், வாசுதேவனை நீதிமன்றத்தில் ஆஜர்படுத்தி சிறையில் அடைத்தனர்.