தமிழக அரசு நீட் தேர்வை ஒரு‌போதும் ஏற்கவில்லை என்று மக்களவை துணை சபாநாயகர் தம்பிதுரை தெரிவித்துள்ளார்.

மருத்துவ படிப்பிற்கு நீட் தேர்வு கட்டாயம் என்ற சட்டத்தில் இருந்து இந்த ஆண்டு விலக்கு பெற தமிழக அரசு பல நடவடிக்கைகளை மேற்கொண்டது. அதற்காக மக்களவை துணை சபாநாயகர் தம்பிதுரை தலைமையில் தமிழக அமைச்சர்கள் மற்றும் நாடாளுமன்ற உறுப்பினர்கள் சிலரும், பிரதமர் மற்றும் மத்திய உள்துறை அமைச்சரிடம் நேரில் கோரிக்கை விடுத்திருந்தனர். ஆனாலும் நீட் தேர்வில் இருந்து தமிழகத்திற்கு ஓராண்டு விலக்கு பெறுவது என்பது நடைபெறாமல் போய்விட்டது.

இந்நிலையில் மருத்துவப் படிப்பில் சேர இயலாமல் அரியலூரை சேர்ந்த மாணவி அனிதா தற்கொலை செய்துகொண்டார். இதுகுறித்து கருத்து தெரிவித்திருந்த தம்பிதுரை மாணவியின் மரணம் வேதனை அளிப்பதாகவும், இனிமேல் எந்த மாணவரும் இதுபோன்று முடிவெடுக்காமல் இருக்க வேண்டும் என்றும் கேட்டுக்கொண்டார்.

இந்த சூழலில் சென்னையில் செய்தியாளர்களை சந்தித்த தம்பிதுரை, நீட் தேர்வை தமிழக அரசு ஒருபோதும் ஏற்கவில்லை என்று தெரிவித்துள்ளார். மேலும் நீட் தேர்வு விவகாரத்தில் அடுத்தகட்ட நடவடிக்கை எடுப்பது குறித்து சட்ட வல்லுநர்களுடன் ஆலோசித்து வருவதாகவும் அவர் கூறினார்.