இலங்கை டூ சென்னை: விமானத்தில் கடத்திவரப்பட்ட 1.55 கிலோ தங்க பசைகள் பறிமுதல்

இலங்கையில் இருந்து சென்னை வந்த விமானத்தில் ரூ.68 லட்சம் மதிப்புடைய 1.55 கிலோ தங்க பசைகளை கடத்தி வந்த 2 பெண்கள் உட்பட 6 பேர் கைது செய்யப்பட்டனர்.

இலங்கையிலிருந்து சென்னை சர்வதேச விமான நிலையத்திற்கு ஏர்இந்தியா விமானம் இன்று அதிகாலை வந்தது. அதில், வந்த பயணிகளை சுங்கத் துறையினர் சோதனையிட்டனர். அப்போது சென்னை மற்றும் சிவகங்கையைச் சேர்ந்த 2 பெண்கள் உட்பட 6 பேர் மீது சுங்கத் துறையினருக்கு சந்தேகம் ஏற்பட்டது.

இதையடுத்து அவர்களின் உடமைகளை சோதனையிட்டதோடு, அவர்களை தனிஅறைகளுக்குள் அழைத்துச் சென்று முழுமையாக சோதனையிட்டனர். அப்போது அவர்களின் உள்ளாடைகளுக்குள் பந்துகள் போன்ற பொருளை மறைத்து வைத்திருந்தனர். அவைகளை திறந்து பார்த்தபோது அதில், தங்க பசைகளை மறைத்து வைத்திருந்தது தெரியவந்தது.

இதைத் தொடர்ந்து அவர்கள் 6 பேரிடமிருந்து ரூ.68 லட்சம் மதிப்புடைய 1.55 கிலோ தங்க பசைகளை பறிமுதல் செய்து; 6 பேரையும் கைது செய்து விசாரணை மேற்கொண்டுள்ளனர்.