கடலூர்: 3 சிறுமிகளுக்கு பாலியல் தொல்லை - காப்பக தாளாளர் போக்சோவில் கைது

கடலூரியில் மூன்று சிறுமிகளை பாலியல் வன்கொடுமை செய்ததாக, சிறுவர் - சிறுமிகள் காப்பகம் மற்றும் தனியார் பள்ளி தாளாளர் போக்சோ சட்டத்தின் கீழ் கைது செய்யப்பட்டார்.

கடலூர் மாவட்டம் மங்கலம்பேட்டையை அடுத்த வீராரெட்டிகுப்பம் கிராமத்தில், அமலா சிறுவர், சிறுமிகள் காப்பகம் மற்றும் தனியார் பள்ளி நடத்தி வருபவர் ஜேசுதாஸ் ராஜா (65). இவர், கடந்த 25.10.2021 அன்று தனது காப்பகத்தில் தங்கியிருந்த 2 சிறுமிகளை காணவில்லை என அலடி காவல் நிலையத்தில் புகார் அளித்தார். இந்த புகாரின் அடிப்படையில் ஆலடி காவல் துறையினர் விசாரணை மேற்கொண்டனர்.

இந்நிலையில், சென்னை மற்றும் அரியலூர் மாவட்டத்தில் இருந்த 2 சிறுமிகளை மீட்ட காவல் துறையினர் அவர்களிடம் விசாரணை நடத்தினர். இதில் அந்த 2 சிறுமிகள் உட்பட 3 சிறுமிகள் பாலியல் தொல்லைக்கு ஆளானது தெரியவந்தது. இதையடுத்து .கடலூர் மாவட்ட பாலியல் வன்கொடுமை தடுப்பு சிறப்பு நீதிமன்றத்தில் 3 சிறுமிகளை ஆஜர்படுத்தினர்.

அப்போது ரகசிய வாக்குமூலம் அளித்த சிறுமிகள், தங்களுக்கு பாலியல் தொல்லை கொடுத்ததால் காப்பகத்திலிருந்து தப்பிச் சென்றதாக நீதிபதியிடம் தெரிவித்தனர். அதைத் தொடர்ந்து ஆலடி பேலீசார் ஜேசுதாஸ் ராஜா மீது வழக்குப் பதிந்து, அவரை போக்சோ சட்டத்தில் கைது செய்து சிறையில் அடைத்தனர்.