ஆறுமுகசாமி ஆணையத்தின் தடை நீக்கப்பட்டதும் முதல் ஆளாக ஆஜராவேன் - ஓ.பன்னீர்செல்வம்

ஜெயலலிதா மரணம் தொடர்பான ஆறுமுகசாமி ஆணையத்துக்கு விதிக்கப்பட்ட தடை நீக்கப்பட்ட பின்னர் முதல் ஆளாக விசாரணைக்கு ஆஜராவேன் என, அதிமுக ஒருங்கிணைப்பாளர் ஓ.பன்னீர்செல்வம் தெரிவித்துள்ளார்.

முன்னாள் முதலமைச்சர் ஜெயலலிதா மரணம் தொடர்பாக 2017ஆம் ஆண்டு செப்டெம்பர் 25ஆம் தேதி ஓய்வுபெற்ற நீதிபதி ஆறுமுகசாமி தலைமையில் விசாரணை ஆணையம் அமைக்கப்பட்டது. அப்போலோ மருத்துவமனை மருத்துவர்கள், செவிலியர்கள், போயஸ் கார்டன் பணியாளர்கள் என 154 பேரிடம் ஆணையம் விசாரித்தது. ஆனால், ஆணையம் அமைவதற்கு காரணமான ஓ.பன்னீர்செல்வத்துக்கு பலமுறை சம்மன் அனுப்பியும் அவர் நேரில் விசாரணைக்கு ஆஜராகவில்லை.

இந்தசூழலில், மருத்துவக் குழு அமைத்து விசாரணை நடத்த வேண்டும் என அப்போலோ மருத்துவமனை தொடர்ந்த வழக்கில் ஆறுமுகசாமி ஆணையத்துக்கு 2019ஆம் ஆண்டு ஏப்ரல் 26ஆம் தேதி உச்சநீதிமன்றம் இடைக்கால தடை விதித்தது.

இந்நிலையில், கடந்த 27 மாதங்களாக விசாரணை நடைபெறாமல் இருக்கும் ஆறுமுகசாமி ஆணையத்தில், நீதிமன்றத்தின் தடை நீக்கப்பட்டதும் முதல் ஆளாக விசாரணைக்கு ஆஜராவேன் என ஓ.பன்னீர்செல்வம் தெரிவித்துள்ளார்.