தடுப்பூசிகளை ஏன் ஏற்றுமதி செய்தீர்கள்? - மோடிக்கு எதிராக சுவரொட்டி: 25 பேர் மீது வழக்கு

வெளிநாடுகளுக்கு கொரோனா தடுப்பூசி ஏற்றுமதி செய்யப்பட்டதை கண்டித்து டெல்லியில் பிரதமர் மோடிக்கு எதிராக சுவரொட்டிகள் ஒட்டிய 25க்கும் மேற்பட்டோர் மீது வழக்குகள் பதிவு செய்யப்பட்டிருப்பது சர்ச்சையாகியுள்ளது.

இரண்டாவது கொரோனா அலை பரவுவதற்கு முன்னர் இந்தியா சுமார் ஆறரை கோடி தடுப்பூசிகளை பல்வேறு நாடுகளுக்கும் ஏற்றுமதி செய்தது. தற்போது இந்தியாவில் கடுமையான தடுப்பூசி பற்றாக்குறை நிலவி வரும் சூழலில், தடுப்பூசிகளை ஏற்றுமதி செய்தது தொடர்பாக மத்திய அரசை நோக்கி கேள்விக்கணைகள் பாய்கின்றன.

தலைநகர் டெல்லியின் பல்வேறு பகுதிகளில் பிரதமர் மோடிக்கு கேள்வி எழுப்பும் வகையில் சுவரொட்டிகள் ஒட்டப்பட்டிருக்கின்றன. இது குறித்த புகைப்படங்கள் சமூக வலைதளங்களில் வேகமாகப் பரவின. சுவரொட்டிகள் பற்றி விசாரணையை துரிதப்படுத்திய டெல்லி காவல்துறை, 25 க்கும் மேற்பட்டோர் மீது வழக்கு பதிவு செய்து 4 பேரை கைதும் செய்துள்ளது. டெல்லி காவல்துறையின் இந்நடவடிக்கைக்கு கடும் எதிர்ப்புக் கிளம்பியுள்ளது.

காங்கிரஸ் தலைவர்கள் ராகுல்காந்தி,  பிரியங்கா காந்தி உள்ளிட்ட பலர், ட்விட்டர் பக்கத்திலும் இதே சுவரொட்டியை பதிவு செய்து, தங்களையும் கைது செய்யுங்கள் எனக் குறிப்பிட்டுள்ளனர். காங்கிரஸ் கட்சியின் மற்றொரு தலைவரான ஜெய்ராம் ரமேஷ், இந்த சுவரொட்டியை தனது வீட்டு வாசலில் ஒட்டி வைத்துள்ளார்.

சமூக வலைதளங்களிலும் #arrestmetoo என்ற ஹாஸ்டேக்கில் நெட்டிசன்களும், மத்திய அரசுக்கு எதிராக தங்களது எதிர்ப்பினை பதிவு செய்து வருகின்றனர். இது அகில இந்திய அளவில் தொடர்ந்து டிரெண்டிங்கில் இருந்து வருகிறது.