வானில் பறக்கிறேன்!

மருத்துவப் படிப்புக்கு லட்சக்கணக்கில் பணம் செலுத்தவேண்டிய இக்காலத்தில், ராணுவ மருத்துவக் கல்லூரியில் இலவசமாக எம்.பி.பி.எஸ். படிக்கலாம் என்ற செய்தி, தேனாக இனித்தது. என் மகனை ஒரு மருத்துவராக்கிப் பார்க்க வேண்டும் என்பது என் லட்சியம். ஆனால் அதற்கேற்ற பொருளாதார வசதி என்னிடம் இல்லை. ராணுவ மருத்துவக் கல்லூரியில் படிக்க என் மகனுக்கு இடம் கிடைக்க வேண்டும் என்பதே என் பிரார்த்தனையாக இருக்கிறது.

- எம்.ஜோதிலிங்கம், விழுப்புரம்.

பிளஸ் டூவுக்குப் பின்னர் தொழிற்கல்வி படிக்கும் மாணவர்கள் தயக்கமின்றி தனக்கான துறையைத் தேர்ந்தெடுத்துக் கொள்கின்றனர். ஆனால் கலை மற்றும் அறிவியல் படிப்புகளைத் தேர்ந்தெடுப்போரின் நிலையோ கண்ணைக் கட்டி காட்டில் விட்டதுபோன்று உள்ளது. இந்நிலையை மாற்றி என்ன படிப்பு படித்தால், எந்தெந்தத் துறையில் வேலைவாய்ப்பு உள்ளது என்று அலசிய கட்டுரை நல்லதொரு வழிகாட்டியாய் அமைந்தது. அதிலும், பி.எஸ்சி. புள்ளியியல் படிப்பு மிகுந்த வேலைவாய்ப்பு உள்ள துறை. ஆனால், மாணவர்கள் போதிய அளவில் அந்த துறையைத் தேர்ந்தெடுப்பதில்லை என்பது போன்ற செய்திகள் நான் அறியாதவை. ஆசிரியரான என்னிடம் பல பெற்றோர் தன் பிள்ளையை எந்தப் படிப்பில் சேர்க்கலாம் என்று கேட்கும்போது தடுமாறும் நிலையே இருந்தது. இனி அவர்களுக்கு தன்னம்பிக்கையோடு பதில் கூறுவேன். ‘புதிய தலைமுறை கல்வி’க்கு மனமார்ந்த நன்றி.

- ச.கிறிஸ்து ஞான வள்ளுவன், வேம்பார்.

மீன்பிடி கப்பல்களை இயக்குவதற்கு ஒரு படிப்பு உள்ளதா? ஃப்ஷரி சயின்ஸ் பற்றி படித்தபோது ஆச்சரியமாக இருந்தது. பொறியியல், மருத்துவம் என்று எல்லோரும் ஒரே மாதிரியான படிப்புகளைப் படிக்காமல், இதுபோன்ற வித்தியாசமான படிப்பைப் படித்தால், வேலைவாய்ப்பும் எளிதாகும்.

- ஆர்.விஸ்வநாதன், தாராபுரம்.

எஸ்.எஸ்.எல்.சி. படித்த மாணவர்கள் உதவித்தொகையுடன் வெஸல் நேவிக்கேட்டர், மெரைன் பிட்டர் ஆகிய படிப்புகளை சிப்நெட் கல்வி நிலையத்தில் படிக்கலாம் என்ற செய்தி மிகவும் பயனுள்ளது. தொடர்ந்து மேற்படிப்பு படிக்க வசதியில்லாத மாணவர்கள் இதுபோன்ற தொழிற்கல்வி கற்று வாழ்க்கையில் முன்னேறலாம்.

- எம்.அம்சவேணி, புதுக்கோட்டை.

பிளஸ் டூவுக்குப் பின் கலை அறிவியல் படிப்புகளில் என்னென்ன படிக்கலாம் என்று பட்டியலிட்டிருந்தது பாராட்டுக்குரியது. வித்தியாசமான, விதவிதமான படிப்புகளாக மாணவர்கள் தேர்ந்தெடுத்துப் படித்தால், வருங்காலம் பிரகாசமாக இருக்கும்.

- ஜெ.பிரியா, சேந்தமங்கலம்.

பைலட் ஆக என்ன செய்யவேண்டும், யாரை அணுகவேண்டும் என்ற தகவல்களை தெளிவாக விளக்கியிருந்தீர்கள். படித்து முடித்தவுடன், மெட்ராஸ் பிளையிங் கிளப்புக்கு போன் போட்டுப் பேசினேன். இப்போதே பைலட் ஆகிவிட்டதுபோல் வானில் பறக்கிறேன்.

-பி.அர்ஜுனன், திருவானைக்காவல்.