புதுச்சேரி: முதல்வர் பதவியை கேட்கும் திமுக - கலக்கத்தில் காங்கிரஸ்

புதுச்சேரியில் முதல்வர் பதவியை திமுக கேட்பதால், காங்கிரஸ் கட்சி கலக்கமடைந்துள்ளது.

புதுச்சேரியில் நடைபெறவுள்ள சட்டமன்ற தேர்தலில் திமுக, காங்கிரஸ் மற்றும் மதசார்பற்ற கட்சிகள் கூட்டணி அமைத்துள்ளன. தொகுதி பங்கீடு தொடர்பாக காங்கிரஸ் மற்றும் திமுக கட்சிகளிடையே இரண்டாவது கட்டமாக புதுச்சேரியில் பேச்சுவார்த்தை நடைபெற்றது.

இதில் காங்கிரஸ் சார்பில் முன்னாள் முதல்வர் நாராயணசாமி, வைத்தியலிங்கம் எம்.பி., காங்கிரஸ் மாநிலத் தலைவர் சுப்பிரமணியன் மற்றும் திமுக சார்பில் மாநில அமைப்பாளர்கள் சிவா, சிவக்குமார் உள்ளிட்டோர் பங்கேற்றனர். பேச்சுவார்த்தையின்போது, திமுக அதிக இடங்களை கேட்டதாகவும், முதலமைச்சர் பதவியையும் கேட்டதாகக் கூறப்படுகிறது.

இதனால் காங்கிரஸ் கட்சி கலக்கமடைந்துள்ளது. சில நாட்களுக்கு முன்பு என்.ஆர்.காங்கிரஸுக்கு திமுக சார்பில் அழைப்பு விடுக்கப்பட்டது குறிப்பிடத்தக்கது. புதுச்சேரியில் காங்கிரஸ் 8 முறையும், திமுக 4 முறையும் ஆட்சியில் இருந்துள்ளன என்பது குறிப்பிடத்தக்கது.