சென்னையில் தேமுதிக பிரமுகர் படுகொலை... முன்விரோதமா? - போலீசார் தீவிர விசாரணை

முன்விரோதம் காரணமாக ராஜ்குமார் கொலை செய்யப்பட்டாரா என்ற கோணத்தில் போலீசார் விசாரித்து வருகின்றனர். 

சென்னை பல்லாவரம் அடுத்த அனகாபுத்தூர் பகுதியை சேர்ந்தவர் ராஜ்குமார் (36). தேமுதிகவில் அனகாபுத்தூர் நகர துணை செயலாளராக இருக்கும் இவர், அதே பகுதியில் டெய்லரிங் கடை நடத்தி வருகிறார். வழக்கம்போல் நேற்று இரவு தனது கடையை பூட்டி விட்டு இருசக்கர வாகனத்தில் வீடு திரும்பியபோது அனாபுத்தூர் பேருந்து நிலையம் அருகே இருசக்கர வாகனத்தை வழிமறித்த இரண்டு மர்ம நபர்கள் அரிவாளால் சரமாரியாக ராஜ்குமாரின் தலையில் வெட்டி விட்டு அங்கிருந்து தப்பி சென்றனர்.

இதனைக்கண்ட அக்கம்பக்கத்தினர் ரத்த வெள்ளத்தில் கிடந்த ராஜ்குமாரை மீட்டு ஆம்புலன்ஸ் மூலம் குரோம்பேட்டை அரசு மருத்துவமனைக்கு அனுப்பி வைத்தனர். ஆனால் அங்கு சிகிச்சை பலனின்றி உயிரிழந்தார். தகவல் அறிந்து வந்த சங்கர் நகர் போலீசார் உடலை மீட்டு பிரேதப் பரிசோதனைக்காக அனுப்பி வைத்தனர். தப்பியோடிய கொலையாளிகளை சங்கர் நகர் போலீசார் தேடி வருகின்றனர்.