மீண்டும் அதிகரிக்கும் கொரோனா - கேரளாவின் 13 நுழைவு எல்லைகளை மூடியது கர்நாடகா

கேரளாவில் கொரோனா வைரஸால் பாதிக்கப்பட்டவர்களின் எண்ணிக்கை திடீரென அதிகரித்து வருவதால், வயநாடு மற்றும் காசர்கோடு மாவட்டத்தில் அமைந்துள்ள 13 கர்நாடக நுழைவுப்பகுதிகளை மூடியது கர்நாடக அரசு.

அண்டை மாநிலமான கேரளாவில் அதிகரித்து வரும் கொரோனா பாதிப்பு எண்ணிக்கை காரணமாக, வயநாடு மற்றும் காசர்கோடு மாவட்டத்தில் அமைந்துள்ள 13  நுழைவு பகுதிகளை மூட கர்நாடக அதிகாரிகள் முடிவு செய்துள்ளனர். இந்த நடவடிக்கையை தேவையற்றது என்று கேரள அரசு சார்பில் கூறப்பட்டுள்ள நிலையில், இது அவசியமானது என்று கர்நாடக அதிகாரிகள் கூறுகின்றனர்.

கேரளாவின் வயநாடு மாவட்டத்தில் கர்நாடகாவிற்கான நுழைவு பகுதிகளில், கர்நாடக அதிகாரிகளால் தங்கள் வாகனங்கள் திடீரென்று நிறுத்தப்பட்டதால் மக்கள் செய்வதறியாமல் திகைத்தனர்."எல்லைகளை மூடுவதற்கான இந்த திடீர் முடிவு மற்றும் ஆர்டி-பி.சி.ஆர் சோதனைகளை வலியுறுத்துவது குறித்து எங்களுக்கு எந்த அறிவிப்பும் இல்லை. பல்வேறு தேவைகளுக்காக சுதந்திரமாக எல்லைகளை கடக்க பயன்படுத்திய அனைவருக்கும் சொல்லப்படாத துயரங்களை இந்த முடிவு உருவாக்கப் போகிறது" என்று மக்கள் தெரிவித்தனர்.

கேரளாவில் கோவிட் -19 வைரஸ் பாதிப்பு தொடர்ந்து அதிகரித்து வருவதால், இது எச்சரிக்கையுடன் கூடிய ஒரு நடவடிக்கையாக கர்நாடக அதிகாரிகள் செய்த செயலாக இருக்கலாம் என்று கேரள பாஜக மாநிலத் தலைவர் சுரேந்திரன் கூறினார். இதற்கிடையில், காங்கிரஸ் மற்றும் ஐ.யூ.எம்.எல் ஆகிய கட்சிகள் எல்லைகளில் போராட்டங்களை நடத்துகின்றன. "இது கர்நாடக அதிகாரிகளின் தேவையற்ற நடவடிக்கை மற்றும் இது மத்திய அரசின் திறத்தல் வழிகாட்டுதல்களை மீறுவதாகும்" என்று கர்நாடக எதிர்க்கட்சி எம்.எல்.ஏ  என்.ஏ.நெல்லிக்குன்னு கூறினார். தற்போது, கேரளாவில் 58,000 க்கும் மேற்பட்ட செயலில் உள்ள கோவிட்-19 வழக்குகள் உள்ளன.