பால கங்காதர திலகரின் கொள்ளுப்பேரன் மீது பாலியல் புகார்

பாலியல் வன்கொடுமை புகாரில் விடுதலைப் போராட்ட வீரர் பால கங்காதர திலகரின் கொள்ளுப்பேரனை மஹாராஷ்டிரா காவல்துறை கைது செய்துள்ளது.

புனேவில் வசித்து வரும் ரோஹித் திலக் மஹாராஷ்டிரா மாநில காங்கிரஸ் கட்சியின் முக்கிய உறுப்பினர். இவர் சுதந்திரப் போராட்ட வீரர் பால கங்காதர திலகரின் கொள்ளுப்பேரன் ஆவார். ரோஹித் திலக்கின் தாத்தா ஜெயந்த்ராவ் திலக், நாடாளுமன்ற உறுப்பினராக இருந்தவர்.

இவர் திருமணம் செய்துகொள்வதாகக் கூறி பலமுறை பாலியல் பலாத்காரம் செய்ததாகவும், இயற்கைக்கு மாறான உறவுக்குக் கட்டாயப்படுத்தினார் எனவும் 40 வயதுப் பெண்மணி புகார் அளித்துள்ளதாக போலீஸ் தரப்பில் தெரிவிக்கப்பட்டுள்ளது. புகாரின் பேரில் ரோஹித் மீது பாலியல் குற்றச்சாட்டு, மிரட்டல் எனப் பல்வேறு பிரிவுகளின் கீழ் வழக்குப்பதிவு செய்யப்பட்டுள்ளது. ரோஹித் திலக்கை, புனே காவல்துறை இன்று காலை கைது செய்து விசாரித்து வருகிறது.