அக்ரி செஸ் எதிரொலி: உயருகிறதா பெட்ரோல், டீசல் விலை?

மத்திய நிதியமைச்சர் நிர்மலா சீதாராமன் தாக்கல் செய்த பட்ஜெட்டில் 'அக்ரி செஸ்' அறிமுகம் செய்யப்பட்டிருக்கிறது. செஸ் என்பது கூடுதல் வரியாகும். இதில், பெட்ரோல் மற்றும் டீசல் மீது கூடுதல் வரி விதிக்கப்படுகிறது. அதாவது, பெட்ரோலுக்கு லிட்டருக்கு 2.50 ரூபாயும், டீசல் மீது லிட்டருக்கு 4 ரூபாயும் உயர்த்தப்பட்டிருக்கிறது.

ஆனால், இந்த கூடுதல் வரியால் நுகர்வோர்கள் பாதிக்கப்படமாட்டார்கள் என அறிவிக்கப்பட்டிருக்கிறது. பெட்ரோல், டீசல் மீது அடிப்படை கலால் வரி மற்றும் சிறப்புக் கூடுதல் கலால் வரி விகிதங்கள் நிதி நிலை அறிக்கையில் குறைக்கப்பட்டுள்ளதால் நுகர்வோருக்கு கூடுதல் சுமை ஏற்படாது என்று நிதியமைச்சர் நிர்மலா சீதாராமன் விளக்கம் அளித்துள்ளார்.

அடிப்படை உற்பத்தி வரி மற்றும் கூடுதல் சிறப்பு உற்பத்தி வரி விகிதம் குறைக்கப்பட்டிருக்கிறது. அதனால் ஒட்டுமொத்த சில்லறை விற்பனை விலையில் மாற்றம் இருக்காது என்று அவர் தெளிவுபடுத்தியிருக்கிறார்.

இந்த மாற்றம் நாளை முதல் (பிப்ரவரி 2) அமலுக்கு வருகிறது. இந்த அக்ரி வரி தங்கம் (2.5%), வெள்ளி (35%) ஆப்பிள் (5%), ஆல்ஹகால் பானங்களுக்கு 100 சதவீதமும் விதிக்கப்படுகிறது.

ஆனால், செய்தியாளர்களிடம் உரையாடிய முன்னாள் மத்திய நிதியமைச்சர் ப.சிதம்பரம், "பெட்ரோல் மற்றும் டீசல் மீதான உற்பத்தி வரிகளில் எந்தவிதமான மாற்றமும் செய்யப்படவில்லை. ஏற்கெனவே இருக்கும் விலைகளில் கூடுதலாக இந்த செஸ் சேர்க்கப்பட்டிருக்கிறது" என தெரிவித்திருக்கிறார். அவரது பார்வையில் பெட்ரோல் - டீசல் விலை உயரும்; அது நிச்சயம் நுகர்வோரை பாதிக்கும் என்பதாகவே இருக்கிறது.

- வா.கா