50 ஆயிரம் புள்ளிகளை தாண்டியது சென்செக்ஸ்

மும்பை பங்குச்சந்தைக் குறியீட்டெண் சென்செக்ஸ் முதன்முறையாக 50 ஆயிரம் புள்ளிகளை தாண்டி புதிய உச்சத்தைத் தொட்டுள்ளது.

இன்று காலை வர்த்தகம் தொடங்கியதும், பங்குச் சந்தை குறியீட்டெண் 300 புள்ளிகள் உயர்ந்து 50ஆயிரத்து 126 புள்ளிகளில் வர்த்தகமாகியது. ரிலையன்ஸ் இன்டஸ்ட்ரீஸ், பஜாஜ் பைனான்ஸ் மற்றும் ஐசிஐசிஐ பங்குகள் ஏற்றத்துடன் வர்த்தகமாகின.

தேசியப் பங்குச்சந்தை குறியீட்டெண்ணான நிஃப்டி சுமார் 100 புள்ளிகள் அதிகரித்து 14 ஆயிரத்து 731 புள்ளிகளில் வர்த்தகமாகியது.

அமெரிக்காவின் புதிய அதிபராக பதவி ஏற்றுள்ள பைடனின் பொருளாதார மீட்பு நடவடிக்கைகள் ஏற்றுமதியை அடிப்படையாகக் கொண்ட ஆசிய நாடுகளின் பொருளாதார மீட்சிக்கும் பெருமளவில் உதவும் எனக் கருதப்படுவதே பங்குச்சந்தை உயர்வுக்கான காரணமாகக் கருதப்படுகிறது.