'கேஜிஎஃப் 2' பட மலையாள வெளியீட்டு உரிமையை கைப்பற்றிய நடிகர் பிரித்விராஜ்

விரைவில் வெளிவர இருக்கும் ’கே.ஜி.எஃப் 2’ மலையாள உரிமையை நடிகர் பிரித்விராஜ் கைப்பற்றியுள்ளார். இதுகுறித்த அதிகாரபூர்வ அறிவிப்பை தனது ட்விட்டர் பக்கத்தில் வெளியிட்டு இருக்கிறார்.

 பிரஷாந்த் நீல் இயக்கத்தில் யாஷ், ஸ்ரீநிதி ஷெட்டி நடிப்பில் கன்னடத்தில் கடந்த 2018 ஆம் ஆண்டு வெளியான ’கேஜிஎஃப்’ பிரம்மாண்டமான வசூல் சாதனை செய்தது. அதனைத்தொடர்ந்து தமிழ், தெலுங்கு, இந்தி என பல்வேறு மொழிகளில் மொழிமாற்றம் செய்யப்பட்டு வெளியாகி அதிலும் வெற்றியை குவித்தது. இந்த வெற்றியால் ’கேஜிஎஃப் 2’ படத்தின் ஷூட்டிங்கை உற்சாகமுடன் அறிவித்து தற்போது இறுதிக்கட்ட படப்பிடிப்பிலும் ஈடுபட்டு வருகிறது படக்குழு. இதன் இரண்டாம் பாகத்தில் சஞ்சய் தத், பிரகாஷ் ராஜ்,ரவீனா தண்டன் உள்ளிட்டோர் நடிக்கிறார்கள். இந்நிலையில், கேஜிஎஃப் ரசிகர்கள் அப்டேட் கேட்டு வந்த நிலையில், அதன் டீசர் யாஷ் பிறந்தநாளான ஜனவரி 8, காலை 10;18 மணிக்கு வெளியாகும் என்று அப்படத்தின் இயக்குநர் பிரஷாந்த் நீல் நேற்று அறிவித்திருந்தார். 

அதனைத்தொடர்ந்து, நேற்றிரவு நடிகர் பிரித்விராஜ் “நான் கே.ஜி.எஃப் படத்தின் மிகப்பெரிய ரசிகன். நாட்டில் மிகவும் எதிர்பார்க்கப்பட்டப் படங்களில் ஒன்றை நான் வழங்குவதற்கான பாக்கியத்தைப் பெறுவதை விட சிறந்த வழி எதுவும் இல்லை. பிரித்விராஜ் புரடொக்‌ஷன் ‘கே.ஜி.எஃப் 2’ வழங்குவதை பெருமைக்கொள்கிறது.உங்களைப் போல லட்சக்கணக்கான ரசிகர்கள் போலவே நானும் ராக்கியை காண ஆவலில் இருக்கிறேன்” என்று உற்சாகமுடன் பதிவிட்டுள்ளார். கேஜிஎஃப் முதல் பாகம் வெளியானபோது அதன் தமிழ் உரிமையை கைப்பற்றியவர் நடிகர் விஷால் என்பது குறிப்பிடத்தக்கது.