மேற்குவங்கத்தில் பாஜக பிரமுகர் கார் மீது துப்பாக்கிச்சூடு

மேற்கு வங்கத்தில் நேற்று மாலை பாஜக செயற்குழு தலைவர் மீது மூவர் துப்பாக்கிச்சூடு நடத்தியுள்ளனர்.

மேற்குவங்கம் மாநிலத்தில் பாஜகவின் செயற்குழு தலைவராக இருக்கும் கிருஷ்ணெந்து முகர்ஜி, நேற்றிரவு கொல்கத்தாவிலிருந்து தனது வீட்டிற்கு புறப்பட்டுள்ளார். அப்போது அசன்சோல் என்ற இடத்தில் அவரது கார்  வந்தபோது அங்கு நின்று கொண்டிருந்த மூன்று பேர் திடீரென்று துப்பாக்கிச்சூடு நடத்தியுள்ளனர். அதிர்ஷ்டவசமாக, முகர்ஜி மீது ஐந்து சுற்று துப்பாக்கிச் சூடு நடத்தப்பட்டபோதும் காயமின்றி அவர் உயிர் தப்பினார்.

இதுகுறித்து போலீசில் புகார் அளித்துள்ள கிருஷ்ணெந்து முகர்ஜி, தன் மீது ஆளும் திரிணாமுல் காங்கிரஸ் கட்சியினர் திட்டமிட்டு துப்பாக்கிச்சூடு நடத்தியதாக குற்றம்சாட்டியுள்ளார்.

துப்பாக்கிச்சூடு நடத்திய முழு சம்பவமும் அங்குள்ள சிசிடிவி கேமராவில் பதிவாகியுள்ளதாகவும், அதனடிப்படையில் விசாரணையை தீவிரப்படுத்தி உள்ளதாகவும் போலீசார் தெரிவித்துள்ளனர்.

கடந்த டிசம்பர் மாதம் மேற்கு வங்க மாநிலம் டயமண்ட் ஹார்பர் தொகுதிக்கு பாஜக தேசிய தலைவர் ஜே.பி.நட்டா சென்றபோது, அவரது கார் அணிவகுப்பு மீது சிலர் தாக்குதல் நடத்தினர். இந்த தாக்குதலுக்கு திரிணாமுல் காங்கிரஸ் கட்சியினர்தான் காரணமென பாஜகவினர் குற்றஞ்சாட்டியது குறிப்பிடத்தக்கது.