பாஜகவின் தடுப்பூசியை எப்படி நம்புவது? அகிலேஷ் யாதவ் கருத்தால் சர்ச்சை

கொரோனா தடுப்பூசியை பாஜகவின் தடுப்பூசி எனவும், அதனால் தடுப்பூசி போடப் போவதில்லை எனவும் அகிலேஷ் யாதவ் கூறியிருப்பது சர்ச்சையைக் கிளப்பியுள்ளது.

கொரோனா வைரசை கட்டுப்படுத்த நாடு முழுவதும் அவசரகால தேவைகளுக்கு, கோவி‌ஷல்டு தடுப்பூசியை பயன்படுத்த மத்திய அரசு அமைத்துள்ள நிபுணர்கள் குழு பரிந்துரை செய்துள்ளது.

இங்கிலாந்தின் ஆக்ஸ்போர்டு பல்கலை கழகம், அஸ்ட்ரஜெனகா மருந்து நிறுவனத்துடன் இணைந்து கோவி‌ஷல்டு தடுப்பூசியை தயாரித்துள்ளது.
இதனையொட்டி கொரோனா தடுப்பூசி போடுவதற்கு முன்னெச்சரிக்கை நடவடிக்கையாக தடுப்பூசி ஒத்திகை நிகழ்வு நாடு முழுவதும் நடத்தப்பட்டு வருகிறது.

இந்தநிலையில், உத்தரப்பிரதேச மாநில முன்னாள் முதல்வரும், சமாஜ்வாதி கட்சியின் தலைவருமான அகிலேஷ் யாதவ், பாஜகவின் தடுப்பூசியை நம்ப முடியாது எனத் தெரிவித்துள்ளார். இதுகுறித்து அவர், " நான் இப்போது தடுப்பூசி போடப் போவதில்லை. பாஜகவின் தடுப்பூசியை நான் எப்படி நம்புவது?. எங்கள் அரசு அமையும்போது அனைவரும் இலவச தடுப்பூசியைப் பெறுவார்கள். எங்களால் பாஜகவின் தடுப்பூசியைச் செலுத்திக்கொள்ள முடியாது" எனக் கூறியுள்ளார்.