நோயாளியின் இதயத்தில் ஒலித்த மெக்சிகன் பாடல்? - வியப்பில் மருத்துவர்கள்!

அமெரிக்காவில் 65 வயதான நோயாளியின் இதயத்தில் பல்ஸ் பார்த்தபோது மெக்சிகன் பாடல் ஒன்று இசைப்பதை மருத்துவர்கள் கண்டறிந்தனர்.

65 வயதான அமெரிக்கர் ஒருவருக்கு மருத்துவமனை ஒன்றில் இடுப்பு மூட்டு மாற்று அறுவை சிகிச்சை மேற்கொள்ளப்பட்டது. சிகிச்சைக்குப் பின் அவருக்கு ரத்தக் குழாய்கள் இயல்பான அளவில் உள்ளனவா அல்லது சுருங்கி உள்ளனவா என்பதை அறிவதற்காக மருத்துவர்கள் டாப்ளர் ஸ்கேன் பரிசோதனை செய்தனர்.

‘டாப்ளர் ஸ்கேன்’ என்பது உடலுக்குள் அசைகிற, நகர்கிற திசுக்களைப் படம்பிடித்துக் காண்பிக்கும் ஒரு பரிசோதனை ஆகும். இந்தப் பரிசோதனையில் இதயத்திலிருந்து பெறப்படும் ஒலி அலைகளை எக்கோ கருவியில் உள்ள கணினி இருபரிமாணம் அல்லது முப்பரிமாணப் படங்களாகத் தயாரித்துத் திரையில் காண்பிக்கும்.   

இந்த ‘டாப்ளர் ஸ்கேன் மூலம் நோயாளியின் காலில் உள்ள துடிப்பை பரிசோதித்தபோது, ஸ்கேனரின் ஸ்பீக்கரில் மெக்சிகன் பாடல் ஒன்று இசைப்பதை கேட்டு மருத்துவர்கள் ஆச்சரியமடைந்தனர். ‘டாப்ளர் ஸ்கேனை வைத்து அந்த நோயாளியை பரிசோதிக்கும்போது மட்டும் இசை ஒலி கேட்பது எப்படி என்பது மருத்துவ நிபுணர்கள் ஆராய்ந்து வருகின்றனர்.

நோயாளியின் புரோஸ்டெடிக் இடுப்புகளில் இருந்து பெறப்பட்ட ரேடியோ சிக்னலை டாப்ளர் ஸ்கேன் செய்திருக்கலாம் என்று மருத்துவர்கள் கருதுகின்றனர்.