பெங்களூரு: லோன் ஆப் மூலம் கடன் பெற்றவருக்கு மிரட்டல்: போலீஸ் வழக்குப்பதிவு

பெங்களூருவில் இணையதள செயலி மூலம் கடன் பெற்றவருக்கு அந்நிறுவனம் மிரட்டல் விடுத்ததாக மத்திய குற்றப்பிரிவு காவல்துறையினர் வழக்குப்பதிவு செய்துள்ளனர்.

செங்கல்பட்டு மாவட்டம் பழையனூரைச் சேர்ந்த விவேக் என்ற இளைஞர் இதுபோன்ற பிரச்னையால் தற்கொலை செய்துக்கொண்ட சம்பவம் பரபரப்பை ஏற்படுத்தியது. இணையதள செயலி மூலம் 4 ஆயிரம் ரூபாய் கடன்பெற்ற அவர், குறித்த நேரத்தில் திருப்பி செலுத்த முடியாத நிலை உருவானது. இதனால் சம்பந்தப்பட்ட செயலி நிறுவனத்தினர் விவேக்கை தகாத வார்த்தைகளால் பேசி மிரட்டி வந்துள்ளனர்.

மேலும், விவேக்கின் நண்பர்களுக்கும் அவர் குறித்து அவதூறாக குறுஞ்செய்தி அனுப்பியதால் மனஉளைச்சல் அடைந்து கிணற்றில் குதித்து தற்கொலை செய்து கொண்ட சோகம் நடந்துள்ளது.

இந்த நிலையில் பெங்களூருவில் இணையதள செயலி மூலம் கடன்பெற்றவருக்கு, அவரது செல்போனில் இருந்து நண்பர்களின் எண்கள், புகைப்படங்களை எடுத்து அவதூறு பரப்பியதாக கூறப்படுகிறது. மேலும் கூடுதல் வட்டி செலுத்தக்கோரி மிரட்டல் விடுத்ததால் அவர் அளித்த புகாரின் பேரில் மத்திய குற்றப்பிரிவு காவல்துறையினர், செயலி நிறுவனம் மீது 3 பிரிவுகளில் வழக்குப்பதிவு செய்து விசாரணை நடத்தி வருகின்றனர்.