அதிமுகவின் முதல்வர் வேட்பாளர் யார் ? இன்று ஆலோசனை !

அடுத்த ஆண்டு நடைபெறவுள்ள சட்டப்பேரவைத் தேர்தலில் அதிமுகவின் முதலமைச்சர் வேட்பாளர் யார் என்பது குறித்து சர்ச்சை எழுந்துள்ள நிலையில் சென்னையில் இன்று அக்கட்சியின் ஆலோசனைக் கூட்டம் நடைபெறவுள்ளது.

ராயப்பேட்டையில் உள்ள அதிமுக தலைமை அலுவலகத்தில் கட்சியின் ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி ஆகியோர் தலைமையில் ஆலோசனைக் கூட்டம் நடைபெறவுள்ளது. ஆலோசனையில் அமைச்சர்கள், கட்சியின் முக்கிய நிர்வாகிகள் உள்ளிட்டோர் கலந்து கொள்ளவுள்ளனர்.

அடுத்த தேர்தலில் அதிமுகவின் முதலமைச்சர் வேட்பாளர் யார் என்பது குறித்து அமைச்சர்கள் மற்றும் நிர்வாகிகள் வேறுபட்ட கருத்துகளை தெரிவிக்க தொடங்கிய பிறகு கட்சி சார்பில் அதிகாரப்பூர்வமாக நடைபெறும் முதல் கூட்டம் இதுவாகும். வருகிற சட்டமன்றத் தேர்தல் குறித்தும், அதிமுகவின் பொதுக்குழுவை கூட்டுவது குறித்தும் கூட்டத்தில் விவாதிக்கப்படும் எனக் எதிர்பார்க்கப்படுகிறது.

கட்சியை வழிநடத்த 11 பேர் கொண்ட உயர்மட்டக் குழு அமைக்க வேண்டும் என ஓ பன்னீர்செல்வம் ஆதரவாளர்கள் வலியுறுத்தி வருவதாக கூறப்படும் நிலையில், அது தொடர்பாகவும் ஆலோசிக்கப்பட வாய்ப்பிருப்பதாக கூறப்படுகிறது.