’’ஒருவருக்கு ரூ.368 செலவிட்டாலே சுகாதார பேரழிவைத் தடுக்கலாம்’’ - முன்னாள் WHO தலைவர்

ஒவ்வொருவரும் உலக சுகாதாரப் பாதுகாப்புக்கு வருடத்திற்கு 5 டாலர்(ரூ.368) சேமித்தாலே ஐந்து வருடத்திற்குப் பிறகு வரும் பேரழிவை சந்திக்க தயாராக இருக்கமுடியும் என உலக சுகாதார நிறுவனத்தின் முன்னாள் தலைவர் க்ரோ ஹார்லெம் தெரிவித்துள்ளார்.

நார்வேயின் முன்னாள் பிரதமரும், உலகளாவிய ஆயத்த கண்காணிப்பு வாரியத்தின்(Global Preparedness Monitoring Board) இயக்குநர்களில் ஒருவருமான க்ரோ ஹார்லெம் புருட்லாண்ட் தற்போது பரவிக்கொண்டிருக்கும் நோய்த்தொற்று பற்றி சில கருத்துக்களை முன்வைத்துள்ளார். முன்பே நாம் பாதுகாப்பாகவும், முன்னெச்சரிக்கையுடனும் இல்லாததால்தான் அதன் விலையை செலுத்திக்கொண்டிருக்கிறோம் எனக் கூறியுள்ளார்.

“கடந்த ஆண்டே உலக அளவில் பலவித சுகாதாரப் பிரச்னைகளும், நோய்க்கிருமிகளும் பரவி வருவதாக உலகளாவிய ஆயத்த கண்காணிப்பு வாரியம் எச்சரித்தது. இந்த நோய்க்கிருமி மிகவும் ஆபத்தானது என்பதை முன்கூட்டியே அறிந்துதான் எச்சரித்தோம். முறையான பாதுகாப்பு நடவடிக்கைகள் எடுக்கப்படவில்லை என்பதை கொரோனா தற்போது உறுதிப்படுத்தி உள்ளது” என ஏற்கனவே வெளியிட்ட அறிக்கையில் தெரிவித்திருந்தார்.

தற்போது வெளியிட்டுள்ள அறிக்கையில், “சரியான வழிநடத்துதல் இல்லாமல் இருப்பதால் அடுத்த சமூகப்பரவல் கண்டிப்பாக சீக்கிரத்தில் வரப்போகிறது. அமைதி, செழிப்பு மற்றும் பாதுகாப்பை வழங்குவதற்கு பதிலாக ஆபத்தான நோய்க்கிருமியை வழங்கிக்கொண்டிருக்கிறோம். இது சமூகத்தின் நிலையை இன்னும் மோசமாக்கும். கொரோனா தடுப்பூசி தயாரிக்க அமெரிக்க அதிபர் ட்ரம்ப் முன்வர மறுத்துவிட்டார். அப்படியே தடுப்பூசி கண்டுபிடிக்கப்பட்டு வளர்ந்த நாடுகளில் பயன்படுத்தப்பட்டாலும், மற்ற நாடுகளில் நோய்த்தொற்றின் நிலை மோசமாக இருக்கும். எப்படியும் 2021 முடிவதற்குள் கொரோனாவுக்கான தடுப்பூசி கண்டுபிடிக்கப்படும்” என கூறியிருக்கிறது.