ஊரடங்கில் வாடகைக்கேட்ட வீட்டு உரிமையாளர்கள்... நடவடிக்கை எடுத்த போலீஸார்

பொதுமுடக்கக் காலத்தில் மாணவர்களிடம் வீட்டு வாடகைக் கேட்ட உரிமையாளர்கள் மீது நடவடிக்கை எடுத்துள்ளனர் டெல்லி போலீஸார்.

வீட்டைவிட்டு வெளியேற்றி விடுவதாக அச்சுறுத்திய வீட்டு உரிமையாளர்கள் மீது மாணவர்கள் பலர் புகார் கொடுத்துள்ளனர். குறிப்பாக வடமேற்கு டெல்லி பகுதியில் உள்ள முகர்ஜி காவல்நிலையத்திற்கு அடுத்தடுத்து வந்த தொடர் புகார்களின்பேரில் போலீஸார் இந்த நடவடிக்கையை எடுத்துள்ளனர்.

இதுவரை வந்துள்ள 9 வழக்குகளின்பேரில் வரம்பு மீறியதாக டெல்லி பேரிடர் மேலாண்மை ஆணையம் அவர்கள்மீது வழக்குத் தொடரலாம் என அறிவித்துள்ளது. இந்திய தண்டனை குறியீட்டுப் பிரிவு 188கீழ், பிரகடனப்படுத்தப்பட்ட சட்டத்திற்கு கீழ்படியாததால் இவர்களுக்கு ஒரு மாதம் சிறை தண்டனை அல்லது ரூ.200 அபராதம் விதிக்கப்படலாம். அல்லது இரண்டும் விதிக்கப்படலாம்.

புலம்பெயர்ந்த தொழிலாளர்கள் மற்றும் மாணவர்களிடம் வாடகை கேட்டு வற்புறுத்தக்கூடாது என காவல்துறை வலியுறுத்தி உள்ளது.