‘தோனி சொன்ன வார்த்தையை நம்பியே பயிற்சி முகாமை சென்னையில் நடத்தினோம்’ காசி விஸ்வநாதன்

கொரோனா அச்சுறுத்தலுக்கு மத்தியில் அடுத்த சில வாரங்களில் துபாயில் ஆரம்பமாக உள்ளது இந்த ஆண்டுக்கான ஐ.பி.எல் தொடர்.

வீரர்கள், அணி நிர்வாகிகள் என கொரோனா தடுப்பு முன்னெச்சரிக்கை நடவடிக்கையாக நெறிக்காட்டு முறைகளை வெளியிட்டது பி.சி.சி.ஐ. 

அதை பின்பற்றி ஐ.பி.எல் தொடரில் விளையாட உள்ள வீரர்களில் பெரும்பாலானோர் துபாய்க்கு சென்றுள்ள நிலையில் கொரோனா பரவல் அதிகமுள்ள சூழலில் சென்னை சூப்பர் கிங்ஸ் அணி சென்னையில் பயிற்சி முகாமை மேற்கொண்டதற்கான காரணத்தை தெரிவித்துள்ளார் சி.எஸ்.கே -வின் தலைமை செயல் அதிகாரி காசி விஸ்வநாதன்.

“ஐ.பி.எல் தொடர் துபாயில் நடத்தப்படுவது உறுதியானதும் சென்னையில் பயிற்சி முகாமை நடத்துவது எனக்கு சரியாக படவில்லை. கொரோனா அச்சுறுத்தல் தான் அதற்கு காரணம். அது குறித்து தோனியிடம் நான் சொன்ன போது, பயிற்சி முகாம் சென்னையில் நடந்தாக வேண்டும் என தெளிவாக சொல்லிவிட்டார். 

நான்கு - ஐந்து மாதங்கள் கிரிக்கெட் விளையாடாத எங்களுக்கு இந்த பயிற்சி பூஸ்டாக இருக்கும் என சொன்னார். மேலும் துபாயில் கடைபிடிக்க வேண்டிய நெறிமுறைகளை சென்னையிலிருந்தே ஆரம்பித்து விடலாம் என சொன்னார். அதன்படியே பயிற்சி முகாமிற்கு சம்மதம் தெரிவித்தேன்” என சி.எஸ்.கே -வின் யூடியூப் சேனலில் அவர் தெரிவித்துள்ளார்.