''நேரடியாக கூகுளில்..'' - வாட்ஸ் அப் கொண்டு வந்த புது அப்டேட்

ஃபார்வேர்ட் மெசேஜ்களின் உண்மைத் தன்மையை அறியும் விதமாகவும் புது அப்டேட்டை வாட்ஸ் அப் கொண்டு வந்துள்ளது.

இணைய வாசிகள் தவிர்க்க முடியாத அப்ளிகேஷன் என்றால் அது வாட்ஸ் அப் தான். நண்பர்கள், உறவுகள், அலுவலக தொடர்புகள், தொழில் வாய்ப்புகள் என அனைத்திற்கும் எல்லோருமே வாட்ஸ் அப் பயன்படுத்த வேண்டி உள்ளது. இதில் குழுவாகவும், தனி நபராகவும் சேட் செய்யும் வசதி உள்ளது. இருந்தாலும் சமயங்களில் வேண்டாத ஃபார்வேர்ட் மெசேஜ்களை தனியாகவும், குழுவிலும் பகிரப்படுகின்றன.

உண்மைத்தன்மை அறியாமல் அனுப்பப்படும் ஃபார்வேர்ட் மெசேஜ்களால் பல சிக்கல்கள் உண்டாகின்றன. இதனை தடுக்க வாட்ஸ் அப் நிறுவனம் பல முயற்சிகளை கையாண்டது. ஃபார்வேர்ட் மெசேஜ்களை 5 நபர்களுக்கு மட்டுமே அனுப்ப முடியும் என அறிவித்தது. இப்படி போலி செய்திகள் ஃபார்வேர்ட் மெசேஜ்களாக பரவுவதை தடுக்கும் விதமாகவும் அதன் உண்மைத் தன்மையை அறியும் விதமாகவும் புது அப்டேட்டை வாட்ஸ் அப் கொண்டு வந்துள்ளது. “search the web” என்ற அப்டேட்டின்படி ஃபார்வேர்ட் மெசேஜ்களுக்கு அருகிலேயே செர்ச் ஆப்ஷன் இருக்கும்.

நேரடியாக கூகுளுடன் இணைக்கப்பட்டிருக்கும் இந்த ஆப்ஷன் மூலம் சம்பந்தப்பட்ட ஃபார்வேர்ட் மெசேஜின் உண்மைத் தன்மை என்ன என்பதை கூகுளில் இருந்து உடனடியாக பெறலாம். இந்த அப்டேட் பிரேசில், மெக்சிகோ, அமெரிக்கா, இத்தாலி, இங்கிலாந்து ஆகிய நாடுகளில் பயன்பாட்டுக்கு வந்துள்ளதாகவும் விரைவில் அனைத்து பயனாளர்களுக்கும் அறிமுகமாகும் எனவும் தெரிவிக்கப்பட்டுள்ளது.