குடித்துவிட்டு தகராறு செய்த ரவுடி வெட்டி கொலை - எதிர்வீட்டு தந்தை, மகன் கைது

மதுரை அருகே பிரபல ரவுடியை தந்தை மற்றும் மகன் உட்பட மூன்று பேர் இணைந்து சரமாரியாக வெட்டிக்கொலை செய்த சம்பவம் நிகழ்ந்துள்ளது.

மதுரை மாவட்டம் புளியங்குளம் பகுதியில் தனியாக வசித்துவந்த பிரபல ரவுடி பம்பை தவமணி என்ற இளைஞரை, அவரது எதிர் வீட்டில் வசிக்கும் பூமிநாதன், மகன் விஜய், பூமிநாதனின் தம்பி முருகன் ஆகியோர் இணைந்து சரமாரியாக அரிவாளால் வெடியதில் சம்பவ இடத்திலேயே உயிரிழந்தார்.

இந்நிலையில் அக்கம் பக்கத்தினர் சம்பம் குறித்து உடனடியாக சிலைமான் காவல் நிலையத்திற்கு தகவல் அளித்ததைத் தொடர்ந்து, சம்பவ இடத்திற்கு வந்த காவல்துறையினர் இறந்த ரவுடியின் உடலை கைப்பற்றி பிரேத பரிசோதனைக்காக மதுரை அரசு ராஜாஜி மருத்துவமனைக்கு கொண்டு சென்றனர். இச்சம்பவம் தொடர்பாக பூமிநாதன், விஜய், முருகன் ஆகியோரை கைது செய்து விசாரணை மேற்கொண்டு வந்தனர்.

காவல்துறையினர் மேற்கொண்ட முதற்கட்ட விசாரணையில்; மதுரை மாவட்டம் புளியங்குளத்தை சேர்ந்தவர் பம்பை தவமணி. இவர் மீது பல்வேறு கொலை, குற்ற வழக்குகள் நிலுவையில் உள்ள நிலையில் தந்தை இறந்ததற்கு பிறகு தன் தாயார் தவமணியை விட்டு பிரிந்து தனியாக வசித்துள்ளார்.

இவர் அவ்வப்போது குடித்துவிட்டு அருகில் உள்ளவர்களிடம் தகராறில் ஈடுபட்டுள்ளார். இவரது எதிர் வீட்டில் பூமிநாதன் என்பவபர் தனது மகன் மற்றும் மகளுடன் வசித்துவந்தார். குடிபோதையில் பம்பை தவமணி எதிர் வீட்டில் குடியிருக்கும் பூமிநாதனுடன் அடிக்கடி தகராறு செய்துள்ளார்.
.வழக்கம் போல் இன்றும் குடிபோதையில் இருவருக்கும் இடையே ஏற்பட்ட தகராறில் கோபமுற்ற பூமிநாதன், அவரது மகன் விஜய் மற்றும் பூமிநாதனின் தம்பி முருகன் ஆகியோர் இணைந்து பம்பை தவமணியை அரிவாளால் சரமாரியாக வெட்டியதில் சம்பவ இடத்திலேயே தவமணி இறந்ததாக போலீஸ் தரப்பில் கூறப்படுகிறது. இது தொடர்பாக விசாரணை நடந்துவருகிறது.