கொரோனாவின் தாக்கமே ஓயவில்லை அதற்குள் பிளேக் நோயா?: அச்சத்தில் சீன மக்கள்

கொரோனா தொற்றிலிருந்து மீள்வதற்குள் சீனாவில் கொடூர பிளேக் நோய் பரவிவருவதாக எச்சரிக்கை விடப்பட்டுள்ளது.

சீனாவின் மங்கோலியா தன்னாட்சி பிரதேசத்துக்கு உட்பட்ட பேயனூர் நகரை சேர்ந்த 27 வயதான இளைஞர் பிளேக் நோயால் பாதிக்கப்பட்டிருப்பது கண்டறியப்பட்டுள்ளது. தொடர்ந்து 17 வயதான அவருடைய சகோதரருக்கும் தொற்று உறுதியானது. தொடர்ந்து இருவரும் தனித்தனி மருத்துவமனையில் அனுமதிக்கப்பட்டு தீவிர சிகிச்சைக்கு உட்படுத்தப்பட்டுள்ளனர்.

மேலும் அவர்களுடன் தொடர்பிலிருந்து 146 பேர் தனிமைப்படுத்தப்பட்டுள்ளனர். மர்மோட் எனப்படும் ஒருவகை அணிலின் இறைச்சியை தின்றதால் இரு சகோதரர்களும் பிளேக் தாக்குதலுக்கு ஆளாகி இருப்பதாக தகவல்கள் தெரிவிக்கின்றன. மர்மோட் இறைச்சியை மக்கள் சாப்பிட வேண்டாம் என்றும், 2020 இறுதிவரை பிளேக் நோய் பரவும் அபாயம் இருப்பதாகவும், சுகாதாரத்துறை அமைச்சகம் தெரிவித்துள்ளது. புபோனிக் பிளேக் ஒரு தொற்றுநோயாகும், இது யெர்சினியா பெஸ்டிஸ் என்ற பாக்டீரியத்தால் ஏற்பட்ட ஒரு நோயாகும்.

இதேபோல அண்மையில் சீன விஞ்ஞானிகள் ஒரு புதிய வகை வைரஸை கண்டுபிடித்தாக தெரிவிக்கப்பட்டது. இது தொற்றுநோயைத் தூண்டும் ஆற்றலைக் கொண்டுள்ளது என கூறப்பட்டுள்ளது. இது மரபணு ரீதியாக H1N1-இடம் இருந்து வந்துள்ளது. இந்த புதிய வகை வைரஸ் ஜி4 (G4)என அழைக்கப்படுகிறததாக தகவல்கள் வெளியானது. இதனால் ஒட்டுமொத்த சீனாவுமே பீதியடைந்தது. இந்த ஜி4 வைரஸ் ஏற்கெனவே விலங்குகளிடம் இருந்து மனிதர்களுக்கு பரவியிலிருந்தாலும், மனிதர்களிடம் இருந்து மற்றொரு மனிதருக்கு பரவுவதற்கான ஆதாரம் இதுவரை இல்லை என பின்பு தெரிவிக்கப்பட்டது சற்றே ஆறுதலாக அமைந்தது.