11, 12-ஆம் வகுப்புகளில் பழைய பாடத் திட்டமே தொடரும் - தமிழக அரசு

11, 12-ம் வகுப்புகளில் 4 பாடத் தொகுப்புகள் கொண்ட பழைய திட்டமே தொடரும் என பள்ளிக் கல்வித்துறை அறிவிப்பு வெளியிட்டுள்ளது.

இது குறித்து தமிழக அரசு வெளியிட்டுள்ள அறிவிப்பில் "மேல்நிலைக் கல்வி பயிலும் மாணவர்களின் மன அழுத்தம் மற்றும் உயர்கல்வி குறித்த அச்சத்தை போக்கும் வகையில் வேலைவாய்ப்பிற்கு ஏற்றதாக பாடத்தொகுப்பு மற்றும் விதிகளை மேம்படுத்தி நடைமுறையிலுள்ள 4 முதன்மை பாடத் தொகுப்புகளுடன் சேர்த்து புதிய வழிமுறைகள் உடன் கூடிய மூன்று முதன்மை பாடத்தொகுப்புகளை அறிமுகப்படுத்தி, மாணவர்கள் மூன்று முதன்மை பாடத்தொகுப்பினையோ அல்லது நான்கு பாடத்தொகுப்பினையோ தேர்வு செய்துகொள்ளும் வகையில் 2020 - 2021 ஆம் கல்வியாண்டு முதல் மேல்நிலை முதலாம் ஆண்டிற்கு நடைமுறைப்படுத்த ஆணையிடப்பட்டது.

மேல்நிலை கல்வி பாடத்திட்டத்தில் மாணவர்கள் மூன்று முதன்மை பாடங்களை மட்டும் தேர்ந்தெடுக்கும்போது அவர்களின் உயர் கல்விக்கான வாய்ப்புகள், வேலைவாய்ப்புகள் குறைய நேரிடும் என்ற பல்வேறு காரணங்களுக்காக 4 பாடத்தொகுப்பையே தொடர்ந்து படிக்க அனுமதிக்குமாறு பொதுமக்கள், பெற்றோர், ஆசிரியர்கள், கோரிக்கை விடுத்திருந்தனர்.

அவர்களின் கோரிக்கையை அரசு பரிசீலித்து 2020- 2021 ஆம் கல்வியாண்டில் ஏற்கெனவே நடைமுறையில் உள்ள நான்கு முதன்மை பாட தொகுப்புகளைக் கொண்ட பாடத்திட்டத்தை மட்டும் அனைத்து பள்ளிகளிலும் தொடர்ந்து நடைமுறைப்படுத்தவும் புதிய பாடத் திட்ட முறை அறிமுகப்படுத்தப்பட்ட அரசாணையை ரத்து செய்து ஆணை பிறப்பிக்குமாறும் பள்ளி கல்வி இயக்குனர் கேட்டுக்கொண்டார்.

எனவே அனைவரது கோரிக்கையை ஏற்று மாணவர்களின் நலன் கருதி நடைமுறையில் உள்ள நான்கு முதன்மை பாட தொகுப்புகளைக் கொண்ட பாடத்திட்டத்தினை மட்டும் அனைத்து பள்ளிகளிலும் தொடர்ந்து நடைமுறைப்படுத்த அரசு ஆணையிடுகிறது." என தெரிவிக்கப்பட்டுள்ளது.