தமிழகத்தில் கொரோனா: இன்று 17 பேர் உயிரிழப்பு, 528 பேர் டிஸ்சார்ஜ் !

தமிழகத்தில் கொரோனா பாதிப்பு காரணமாக இன்று மட்டும் 17 பேர் உயிரிழந்துள்ளனர். மேலும் 528 பேர் கொரோனா தொற்றிலிருந்து குணமாகி வீடு திரும்பியுள்ளனர்.

தமிழகத்தில் இன்று மட்டும் 1,562 பேருக்கு கொரோனா வைரஸ் பாதிப்பு உறுதி செய்யப்பட்டுள்ள நிலையில், சென்னையில் மட்டும் 1,149 பேருக்கு கொரோனா தொற்று கண்டறியப்பட்டுள்ளது.

தமிழகத்தில் நாளுக்குநாள் கொரோனா வைரஸ் பாதிப்பு அதிகரித்து வருகிறது. இதுதொடர்பான தகவல்களை சுகாதாரத்துறை தினந்தோறும் வெளியிட்டு வருகிறது. அந்த வகையில் தமிழகத்தில் இன்று மட்டும் 1,562 பேருக்கு கொரோனா வைரஸ் உறுதி செய்யப்பட்டுள்ளது. இதனால் தமிழகத்தில் கொரோனா வைரசால் பாதிக்கப்பட்டோர் எண்ணிக்கை 33,229 ஆக அதிகரித்துள்ளது. தொடர்ந்து 9 வது நாளாக இன்றும் ஆயிரத்திற்கும் அதிகமான எண்ணிக்கையில் கொரொனா உறுதி செய்யப்பட்டுள்ளது.

அதேசமயம் தமிழகத்தில் இன்று ஒரே நாளில் 528 பேர் கொரோனாவிலிருந்து குணமடைந்து வீடு திரும்பியுள்ளனர். இதனால் குணமடைந்தோர் எண்ணிக்கை 16,527 உயர்ந்துள்ளது. இன்று மட்டும் ஒரே நாளில் 17 பேர் உயிரிழந்த நிலையில் இதுவரை மொத்தம் 286 பேர் உயிரிழந்துள்ளனர். தமிழகத்தில் 7வது முறையாக உயிரிழப்பு இரட்டை விகிதத்தில் பதிவாகியுள்ளது.

சென்னையில் மட்டும் இன்று 1,149 பேருக்கு கொரோனா வைரஸ் பாதிப்பு உறுதி செய்யப்பட்டுள்ளது. இதனால் சென்னையில் கொரோனா பாதிப்பின் எண்ணிக்கை 23,298 ஆக உயர்ந்துள்ளது.