சாலையில் கிடந்த 11 ஆயிரம் பணம்: அரை மணி நேரத்தில் உரியவரிடம் ஒப்படைத்த காவலர்

சாலையில் தவறவிட்ட பெண்ணின் 11 ஆயிரம் ரூபாய் பணத்தை அரை மணி நேரத்தில் ஒப்படைத்த காவலருக்கு பாராட்டுகள் குவிந்து வருகின்றன.

மதுரை மாவட்டம் திருநகரைச் சேர்ந்த தனலட்சுமி  என்பவர், திருநகர் காவல் நிலையம் எதிரே உள்ள  சாலையில் நடந்து சென்றபோது எதிர்பாராத விதமாக தான் வைத்திருந்த   11 ஆயிரம் ரூபாய் பணத்தை தவற விட்டுள்ளார். இந்நிலையில் திருநகர் காவல் நிலையத்தில் பணிபுரியும் காவலர் கலையரசன், சாலையில் கிடந்த பையை எடுத்து பார்த்தபோது அதில் 11 ஆயிரம் ரூபாய் பணம் இருந்துள்ளது. அதனை காவல் நிலையத்தில் ஒப்படைத்த நிலையில் தனலட்சுமி தனது பணத்தை தவறவிட்டதாக காவல் நிலையத்தில் புகார் அளித்தார்.

இதைத்தொடர்ந்து காவல் ஆய்வாளர் கணேசன் முன்னிலையில் தனலட்சுமியிடம் பணம் ஒப்படைக்கப்பட்டது. பெண்மணி தவறவிட்ட பணத்தை உடனடியாக உரியவரிடம் ஒப்படைத்த காவலர் கலையரசனின் நற்செயலை மதுரை மாநகர காவல் ஆணையர் டேவிட்சன் தேவாசீர்வாதம் பாராட்டியுள்ளார்.