JUST IN

Advertisement

தாய் இறந்து போனது தெரியாமல் விடாமல் எழுப்பிய குழந்தை -  மனதை உலுக்கும் வீடியோ 

india-s-first-5g-video-call-demoed-by-ericsson-qualcomm-at-imc
 
 
பீகார் மாநிலம் முசாபர்பூரில் உள்ள ரயில் நிலையத்தில் இறந்து போன தனது தாயை ஒரு குழந்தை எழுப்ப முயற்சி செய்யும் வீடியோ ஒன்று சமூக வலைத்தளத்தில் வைரலாகி உள்ளது. மேலும் அந்தக் காட்சி பார்ப்பவர்களைச் சோகத்தில் ஆழ்த்தியுள்ளது.
 
கடந்த மார்ச் மாத இறுதியில் நாடு முழுவதும் ஊரடங்கு அமல்படுத்தப்பட்டது. தொடர்ந்து போடப்பட்ட நான்காவது கட்ட ஊரடங்கு வரும் 31 ஆம் தேதியுடன் நிறைவடைய உள்ளது. இந்த ஊரடங்கு காலத்தில் அனைத்து தொழிற்சாலைகளும் மூடப்பட்டதால் லட்சக்கணக்கான வடமாநில தொழிலாளர்கள்  வேலையில்லாத நிலைக்குத் தள்ளப்பட்டனர். ஆகவே அவர்கள் பிழைப்பு தேடி வந்த மாநிலங்களைவிட்டு தங்களின் சொந்த மாநிலங்களுக்கு நடந்தே பயணிக்கத் தொடங்கினர். 
 
image
 
லட்சக்கணக்கான புலம்பெயர்ந்த தொழிலாளர்களின் நிலைமை உணர்ந்து நான்காம் கட்ட ஊரடங்கில் சில தளர்வுகளை அறிவித்தது மத்திய அரசு. மேலும் வேறு மாநிலங்களில் சிக்கித் தவிக்கும் புலம்பெயர் தொழிலாளர்களை மீட்கச் சிறப்பு ரயில்களை இயக்க தொடங்கியது. அதனால் பல லட்சக் கணக்கான மக்கள் அந்த ரயில்களில் தங்களின் சொந்த பகுதிக்குத் திரும்பி வருகின்றனர். 
 
இந்நிலையில் சமூக வலைத்தளத்தில் ஒரு வீடியோ ஒன்று வைரலாகி வருகிறது. வெளியாகியுள்ள அந்த வீடியோவில் குழந்தை ஒன்று ரயிலே ப்ளாட் ஃபாரத்தில் போர்வையால் மூடப்பட்டுள்ள ஒருவரைப் பலமுறை விடாமல் எழுப்ப முயல்கிறது. ஆனால் அந்தக் குழந்தை எவ்வளவு முயன்றும் அந்தப் போர்வைக்குள் இருப்பவர் எழவே இல்லை.  மேலும் அசைவுகளும் இல்லை. இந்த வீடியோ குறித்த செய்திக் குறிப்பை என்.டி.டிவி செய்தி தளம் வெளியிட்டுள்ளது. அந்தப் போர்வைக்குள் இருப்பவர் அந்தக் குழந்தையின் தாய் என்பதும், அவர் ஒரு புலம்பெயர் தொழிலாளி என்பதும் விசாரணையின் மூலம் தெரிய வந்துள்ளது. 
 
image
 
இந்த வீடியோ பதிவு பீகார் மாநிலம் முசாபர்பூரில் உள்ள ஒரு நிலையத்திலிருந்து எடுக்கப்பட்டுள்ளது.  23 வயது  மதிக்கத்தக்கப் பெண்  புலம்பெயர்ந்தோருக்கான சிறப்பு ரயில் மூலம் கடந்த திங்கள்கிழமை பீகாருக்கு குடும்பத்தினருடன் வந்திருந்தார். கடுமையான வெயில், போதிய உணவு, குடிப்பதற்கான குடிநீர் இல்லாததால் அந்தப் பெண் இறக்க நேர்ந்ததாக அவரது உறவினர்கள் கூறியுள்ளனர். மேலும் அவரது குடும்பத்தார் கொடுத்துள்ள தகவலின்படி இந்தக் குடும்பம் குஜராத்திலிருந்து புறப்பட்டதாகவும் திங்களன்று முசாபர்பூர் ரயில் நிலையத்திலிருந்து ரயிலை எடுப்பதற்கு முன் இப்பெண்ணின் உடல்நிலை சரியில்லாமல் சரிந்ததாகத் தெரியவந்துள்ளது. 
 
image
 
இதனிடையே அந்தப் பெண் உடல்நிலை சரியில்லாமல்தான் இறந்தார் என்று ரயில்வே அமைச்சகம் விளக்கம் அளித்துள்ளது. அவர் இறந்த பின்னர் அக்குடும்பத்தினர் முசாபர்பூர் நிலையத்தில் இறங்குமாறு கேட்டுக்கொள்ளப்பட்டனர் என்றும் கூறியுள்ளது. மேலும்  இறந்து போன அந்தப் பெண் தனது சகோதரி, சகோதரியின் கணவர் மற்றும் இரண்டு குழந்தைகளுடன் கதிஹார் சென்று கொண்டிருந்ததாக அமைச்சகம் தெரிவித்துள்ளது.
 
 
 
 
 
 
Advertisement:

Advertisement

Advertisement

Advertisement