வளைகுடா நாடுகளில் கொரோனாவின் கோரப் பிடியில் இந்தியர்கள்

வளைகுடா நாடுகளில் இருக்கும் 10 ஆயிரத்துக்கும் மேற்பட்ட இந்தியர்களுக்கு கொரோனா பாதிப்பு உறுதி செய்யப்பட்டுள்ளதாக தகவல்கள் வெளியாகி இருப்பது பெரும் அச்சத்தையும் சோகத்தையும் ஏற்படுத்தியிருக்கிறது.

இந்தியாவில் 46,433 பேருக்கு இதுவரை கொரோனா உறுதி செய்யப்பட்டிருந்தாலும், அவர்களில் 12 ஆயிரத்து 727 பேர் குணமடைந்து வீடு திரும்பியுள்ளனர். கொரோனாவால் உயிரிழந்தவர்கள் எண்ணிக்கை ஆயிரத்து 568 ஆகவுள்ளது. 32ஆயிரத்து 138 பேர் சிகிச்சையில் உள்ளனர்.

இந்தியாவிலேயே அதிகம் பாதிக்கப்பட்ட மாநிலமாக மகாராஷ்டிரா உள்ளது. அங்கு‌ பாதிக்கப்பட்டோர் எண்ணிக்கை 14,541. அதற்கு அடுத்தப்படியாக குஜராத்தில் 5804 பேர் தொற்றுக்கு ஆளாகியுள்ளனர். டெல்லியில் தொற்றுக்கு ஆளாகியவர்கள் எண்ணிக்கை 4,898. ராஜஸ்தானில் 3061 பேரும், மத்திய பிரதேசத்தில் 2,942 பேரும், உத்தரப்பிரதேசத்தில் 2766 பேரும் தொற்‌றுக்கு ஆளாகியுள்ளனர்.

இந்நிலையில் வளைகுடாவில் இருக்கும் 10 ஆயிரத்துக்கும் மேற்பட்ட இந்தியர்கள் கொரோனா தொற்றுக்கு ஆளாகியிருப்பதாக பிடிஐ நிறுவனம் செய்தி வெளியிட்டிருக்கிறது. மேலும் கொரோனாவின் கோரப்பிடியில் 84 இந்தியர்கள் உயிரிழந்திருப்பதாகவும் தகவல் தெரிவித்துள்ளது. இதனையடுத்து வெளிநாடுகளில் உள்ள இந்தியர்களை மீட்டு வர வெளியுறவுத்துறை அமைச்சகம் தீவிரமாக ஈடுபட்டு வருவதாகவும் கூறப்படுகிறது.

இதனிடையே வெளிநாடுகளில் தவிக்கும் இந்தியர்களை மே 7 முதல் மே 13 ஆம் தேதி வரை 64 விமானங்களை இயக்கி மீட்டு வர ஏற்பாடுகள் செய்யப்பட்டு வருவதாக மத்திய அரசு வட்டாரங்கள் தெரிவிக்கின்றன. இதனை திட்டமிட்டப்படி நடத்தினால் இதுவரை உலகிலேயே இதுதான் மிகப் பெரிய கொரோனா மீட்பு நடவடிக்கையாக கருதப்படும் என்றும் கூறப்படுகிறது.