இந்தியாவில் வேலைவாய்ப்பின்மை 3 ஆண்டுகளில் இல்லாதளவு உயர்வு

இந்தியாவில் வேலைவாய்ப்பின்மை 3 ஆண்டுகளில் இல்லாத அளவிற்கு அதிகரித்தது தெரியவந்துள்ளது. மற்ற மாநிலங்களை ஒப்பிடும்போது தமிழ்நாட்டில்தான் வேலைவாய்ப்பின்மை மிகவும் குறைவாக உள்ளதும் தெரியவந்திருக்கிறது.

இந்திய பொருளாதாரத்தை ஆய்வு செய்யும் CMIE என்ற அமைப்பு வேலைவாய்ப்பின்மை தொடர்பான புள்ளி விவரங்களை வெளியிட்டுள்ளது. அதில், வேலைவாய்ப்பின்மை சென்ற அக்டோபர் ‌மாதத்தில் 8.5 சதவிகிதமாக அதிகரித்துள்ளதாகவும், இது 2016-ஆம் ஆண்டுக்குப் பிறகு அதிகம் என்றும் CMIE தெரிவித்துள்ளது.

நகர்ப்புறங்களில் வேலைவாய்ப்பின்மை 8.9 சதவிகிதமாகவும், கிராமப்புறங்களில் வேலைவாய்ப்பின்மை 8.3 சதவிகிதமாகவும் அதிகரித்துள்ளது தெரியவந்துள்ளது. குறிப்பாக, ஹரியானா, திரிபுரா ஆகிய மாநிலங்களில் வேலைவாய்ப்பின்மை 20 சதவிகிதமாக அதிகரித்துள்ளது. அதேநேரம், தமிழ்நாட்டில் வேலைவாய்ப்பின்மை 1.1 சதவிகிதம் என மிகக்குறைந்த அளவாக இருப்பதும் தெரியவந்திருக்கிறது.