கனமழையால் வெள்ளம் : அதிகரிக்கும் உயிரிழப்புகள்

கனமழை, வெள்ளம் காரணமாக பீகார், ஜார்க்கண்ட் மற்றும் உத்தர பிரதேசத்தில் 54 பேர் உயிரிழந்துள்ளனர். அசாமில் உயிரிழந்தோர் எண்ணிக்கை 74 ஆக அதிகரித்தது.

பீகாரில் கடந்த இரண்டு நாட்களாக பெய்துவரும் கனமழையால் பல்வேறு பகுதிகளில் வெள்ளம் சூழ்ந்துள்ளது. அங்கு 17 பேர் மழை வெள்ளம், மண்சரிவு, சுவர் இடிந்த சம்பவங்களில் உயிரிழந்துள்ளனர். மேலும் 13 பேர் மின்னல் தாக்கி உயிரிழந்துள்ளனர். உத்தர பிரதேசத்தில் சுவர் இடிந்து விழுந்தது, மின்னல் தாக்கியது உள்ளிட்ட காரணங்களால் 14 பேர் உயிரிழந்துள்ளனர். 

உத்தரபிரதேசத்தின் பல்வேறு பகுதிகளில் இன்றும் மிக கனமழை பெய்ய வாய்ப்பிருப்பதாக வானிலை ஆய்வு மையம் எச்சரித்துள்ளது. அசாமில் வெள்ள பாதிப்பினால் உயிரிழந்தவர்கள் எண்ணிக்கை 74 ஆக அதிகரித்துள்ளது. அசாமின் 33 மாவட்டங்களில் 20 மாவட்டங்கள் வெள்ளத்தில் கடுமையாக சிக்கித் தவிப்பதாக மாநில பேரிடர் மீட்பு ஆணையம் தெரிவித்துள்ளது. இதனால் 38.82 லட்சம் பாதிக்கப்பட்டுள்ளதாகவும் தெரிவிக்கப்பட்டுள்ளது. மும்பையிலும் நேற்று கனமழை பெய்தது. டெல்லியில் ஒரு சில இடங்களில் மட்டும் மழை பதிவானது.