பட்ஜெட் எதிரொலி.. சென்னையில் பெட்ரோல், டீசல் விலை அதிகரிப்பு..!

மத்திய பட்ஜெட்டில் பெட்ரோல், டீசல் மீது வரி உயர்வு அறிவிக்கப்பட்ட நிலலையில் இன்று பெட்ரோல் மற்றும் டீசலின் விலை அதிகரித்துள்ளது.

மத்திய பட்ஜெட்டை நிதியமைச்சர் நிர்மலா சீதாராமன் நேற்று தாக்கல் செய்தார். அதில் பெட்ரோல், டீசல் மீது கூடுதலாக 1 ரூபாய் உற்பத்தி வரி விதிக்கப்பட்டது. இதன் காரணமாக இன்று பெட்ரோல், டீசல் விலையில் உயர்வு காணப்படுகிறது. நேற்று சென்னையில் ஒரு லிட்டர் பெட்ரோல் விலை 73 ரூபாய் 19 காசுகளுக்கு விற்பனையானது. அதேபோல் ஒரு லிட்டர் டீசல் விலை 67 ரூபாய் 96 காசுகளுக்கு விற்பனையானது.

ஆனால் இன்று சென்னையில் ஒரு லிட்டர் பெட்ரோல் விலை 2 ரூபாய் 57 காசுகள் அதிகரித்து 75 ரூபாய் 76 காசுகளுக்கு விற்பனையாகிறது. அதேபோல ஒரு லிட்டர் டீசல் விலை 2 ரூபாய் 52 காசுகள் உயர்ந்து 70 ரூபாய் 48 காசுகளுக்கு விற்பனையாகிறது. பெட்ரோல், டீசல் மீது வரி உயர்வு அறிவிக்கப்பட்டதே விலை உயர்வுக்கு காரணமாகும். பெட்ரோல், டீசல் விலை அதிகரிப்பால் இருசக்கர வாகனங்களில் அலுவலகம் செல்வோர், நடுத்தர மக்கள் எனப் பலரும் பாதிக்கப்பட்டுள்ளனர்.