மருத்துவமனையில் வாஜ்பாய் - மோடி, ராகுல் நேரில் நலம் விசாரிப்பு

மருத்துவமனையில் அனுமதிக்கப்பட்டுள்ள முன்னாள் பிரதமர் வாஜ்பாயை பிரதமர் மோடி மற்றும் ராகுல் காந்தி நேரில் சந்தித்து நலம் விசாரித்தனர்.

வாஜ்பாய் தீவிர அரசியலில் இருந்து ஒதுங்கி ஓய்வு எடுத்து வருகிறார். இந்நிலையில், வாஜ்பாய் டெல்லி எய்ம்ஸ் மருத்துவமனையில் இன்று காலை 11.30 மணியளவில் அனுமதிக்கப்பட்டார். வழக்கமான பரிசோதனைக்காகவே வாஜ்பாய் அனுமதிக்கப்பட்டிருப்பதாக எய்ம்ஸ் நிர்வாகம் தெரிவித்துள்ளது.

இந்நிலையில், எய்ம்ஸ் மருத்துவமனைக்கு சென்ற பிரதமர் மோடி வாஜ்பாயின் உடல் நலம் குறித்து விசாரித்தார். சுமார் 50 நிமிடங்கள் வரை அவர் மருத்துவமனையில் இருந்தார். மருத்துவர்களிடம் வாஜ்பாயின் உடல் நலம் குறித்து பிரதமர் கேட்டறிந்தார். வாஜ்பாயின் உடல்நலம் குறித்து அவரது உறவினர்களிடமும் உரையாடினார் மோடி. பாஜக மூத்த தலைவர்கள் அத்வானி, அமித்ஷா, ராஜ்நாத் சிங் உள்ளிட்டோரும் வாஜ்பாயை சந்தித்து நலம் விசாரித்தனர். 

இதனிடையே, காங்கிரஸ் கட்சியின் தலைவர் ராகுல் காந்தியும் எய்ம்ஸ் மருத்துவமனையில் வாஜ்பாயை சந்தித்தார்.