பாஜகவுடன் அதிமுகவுக்கு உறவு இல்லை: ராஜேந்திர பாலாஜி

பாஜக - அதிமுக இடையே அரசியல் ரீதியான உறவு இல்லை என பால்வளத்துறை அமைச்சர் ராஜேந்திர பாலாஜி தெரிவித்துள்ளார். 

பால் உற்பத்தியாளர்கள் மாநில மாநாடு திருச்சி மத்திய பேருந்து நிலையம் அருகே உள்ள கலையரங்கம் திருமண மண்டபத்தில் நடைபெற்றது. இதில் பங்கேற்று பேசிய ராஜேந்திர பாலாஜி, “ஆவின் நிர்வாகத்தை பலர் அழிக்க நினைத்தனர். நிறுவனத்தை காப்பாற்றியது பால் உற்பத்தியாளர்களாகிய நீங்கள்தான். தற்போது சிங்கப்பூரிலும் ஆவின் பால் விற்பனையாகிறது. எடப்பாடி பழனிச்சாமி தலைமையிலான அரசு பல போராட்டங்களை சமாளித்து திறம்பட ஆட்சி நடத்தி வருகிறார்” என்றார். 

பின்னர் செய்தியாளர் செய்தியாளர்களை சந்தித்த அவர், “அரசாங்க, நிர்வாக ரீதியாக தான் பிரதமர் கூறியதை கேட்டோம். அரசியல் ரீதியாக இல்லை. எஞ்சிய 3 அரை ஆண்டுகளும் அதிமுக நிலைத்து ஆளும். இரட்டை இலை வீழ்ந்ததாக சரித்திரம் இல்லை. துணை முதல்வர் பேசியது யதார்த்தமானது. அதை அரசியலாக்க வேண்டாம்” என்று கூறினார்.