12 நாள் குழந்தையை தண்ணீரில் மூழ்கடித்துக் கொன்ற கொடூர தந்தை கைது

பிறந்து 12 நாட்களே ஆன பெண் குழந்தையை தண்ணீரில் மூழ்கடித்துக் கொன்ற தந்தை கைது செய்யப்பட்டுள்ளார்.

நாமக்கல் மாவட்டம் குமாரபாளையம் அருகே கல்லங்காட்டுவலசு பகுதியைச் சேர்ந்த பூபதி, தனலட்சுமி தம்பதிக்கு 12 நாட்களுக்கு முன் பெண் குழந்தை பிறந்தது. வேலை எதுவும் செய்யாத நிலையில், வீட்டிலேயே இருந்த பூபதி, மனைவி தனலட்சுமி கருவுற்றதில் இருந்து அதனை கலைக்க முயன்றதாக கூறப்படுகிறது. இதற்கு குடும்பத்தினர் ஒத்துழைப்பு தரவில்லை. குழந்தை பிறந்த பிறகும் பூபதி வேலைக்கு செல்லாதது குடும்பத்தில் பெரிய பிரச்னையாக உருவெடுத்துள்ளது.

இந்நிலையில், நேற்று குழந்தையை காணவில்லை என்று தேடிய தனலட்சுமி, குமாரபாளையம் ‌காவல் நிலையத்தில் புகார் அளித்தார். இன்று காலை, அப்பகுதியில் புதிதாக கட்டப்பட்டுக் கொண்டிருக்கும் வீட்டின் தண்ணீர் தொட்டியில் குழந்தையின் உடல் கிடைத்தது. இதுதொடர்பாக நடத்தப்பட்ட விசாரணையில், குழந்தையை கொன்றதை பூபதி ஒப்புக்கொண்டார். இதையடுத்து கைது செய்யப்பட்ட பூபதி, திருச்செங்கோடு நீதிமன்றத்தில் ஆஜர்படுத்தப்பட்டு 15 நாள் நீதிமன்றக் காவலில் சேலம் சிறையில் அடைக்கப்பட்டார்.