குஜராத் சட்டப்பேரவை தேர்தல் முடிவுகள் பாஜகவுக்கு மிகப்பெரிய அடி கொடுத்துள்ளதாக காங்கிரஸ் கட்சி தலைவர் ராகுல் காந்தி கூறியுள்ளார்.

குஜராத் மற்றும் இமாச்சலப் பிரதேசத்தின் தேர்தல் முடிவுகள் குறித்து டெல்லியில் செய்தியாளர்களிடம் பேசிய ராகுல், குஜராத்தில் பாஜகவின் தேர்தல் பிரசாரம் தோல்வி அடைந்திருப்பதாகத் தெரிவித்தார். மோடியின் பிம்பத்தை மக்கள் நிராகரித்துள்ளனர் என்பதையே குஜ‌ராத் தேர்தல் முடிவு காட்டுவதாகவும் அவர் கூறினார். இதன்மூலம் காங்கிரஸ் கட்சிக்கு வெற்றி கிடைத்திருப்பதாகவும், பாரதிய ஜனதாவுக்கு பெரும் பின்னடைவு ஏற்பட்டுள்ளதாகவும் அவர் குறிப்பிட்டார்.

பாரதிய ஜனதாவிற்கு மக்கள் நல்ல பாடம் கற்பித்துள்ளதாகவும் கூறினார். குஜராத்தில் முந்தைய தேர்தலில் 115 இடங்களில் வெற்றி பெற்ற பாரதிய ஜனதா தற்போது 99 இடங்களில் மட்டுமே வெற்றி கண்டு, ஆட்சியை தக்கவைத்தது. 61 இடங்களில் வெற்றி பெற்றிருந்த காங்கிரஸ் கட்சி, இம்முறை 77 இடங்களில் வெற்றிவாகை சூடியது எனவும் சுட்டிக்காட்டினார். நரேந்திர மோடி தேர்தல் பிரசாரத்தின்போது வளர்ச்சி, ஜிஎஸ்டி, பணமதிப்பு நீக்க நடவடிக்கை குறித்து பேசவில்லை என்று கூறிய ராகுல், மோடியின் நம்பகத்தன்மையில் பிரச்னை ஏற்பட்டுள்ளதாக விமர்சித்தார்.