சென்னையில் விடிய விடிய கொட்டித் தீர்த்த மழை

சென்னையில் விடிய விடிய கனமழை கொட்டித் தீர்த்தது. இன்று காலையும் பல்வேறு இடங்களில் பரவலாக மழை பெய்து வருகிறது.

வங்கக் கடலில் உருவான ஒகி புயல் கன்னியாகுமரி, நெல்லை, தூத்துக்குடி ஆகிய மூன்று மாவட்டங்களையும் புரட்டி போட்டுள்ளது. இதனால் நேற்று முன்தினம் அங்கு பெய்யத் தொடங்கிய கனமழை அவ்வப்போது விட்டு விட்டு பெய்து வருகிறது. இதனால் வீட்டுக்குள்ளேயே பொதுமக்கள் முடங்கி கிடக்கின்றனர். சாலைகளிலும் ஏராளமான மரங்கள் முறிந்து விழுந்துள்ளன. அதுமட்டுமில்லாமல் நேற்று தமிழகம் முழுவதும் பரலவாக மழை பெய்தது.

சென்னையில் நேற்று பெய்யத் தொடங்கிய கனமழை விட்டு விட்டு இரவு முழுக்க கொட்டித் தீர்த்தது. இதனால் சாலைகளில் ஆங்காங்கே மழை நீர் தேங்கியுள்ளது. இந்நிலையில் இன்றும் ஈக்காட்டுத்தாங்கல், கிண்டி, சைதாப்பேட்டை, எழும்பூர், வேளச்சேரி உள்ளிட்ட பகுதிகளில் பரவலாக மழை பெய்து வருகிறது. இதனால் அலுவலகங்களுக்கு செல்வோர் மிகுந்த சிரமத்திற்கு ஆளாகியுள்ளனர்.