செவிலியர்களின் பணி நிரந்தரம் உள்ளிட்ட கோரிக்கைகளை தமிழக அரசு உடனடியாக நிறைவேற்ற வேண்டும் என தமிழக வாழ்வுரிமை கட்சி வலியுறுத்தியுள்ளது.

இதுதொடர்பாக அக்கட்சியின் தலைவர் வேல்முருகன் விடுத்துள்ள அறிக்கையில், 2015 ஆம் ஆண்டில் மருத்துவர் தேர்வாணைய தகுதித் தேர்வின் மூலம் பணியமர்த்தப்பட்ட 11,000 செவிலியர்களின் கோரிக்கைகளை நிறைவேற்றாமல் தமிழக அரசு ஏமாற்றி வருவதாக குறிப்பிட்டுள்ளார். கடன்பட்டு கஷ்டப்பட்டு படித்து வந்த செவிலியர்களுக்கு நியாயமான சம்பளம் வழங்கப்படவில்லை என்று குற்றம்சாட்டிய வேல்முருகன், கோரிக்கைகளை வலியுறுத்தி போராடிய செவிலியர்கள் டிஎம்எஸ் வளாகத்தில் சிறைவைக்கப்பட்டதற்கு கண்டனம் தெரிவித்துள்ளார்.

இதனிடையே, செவிலியர்கள் போராட்டத்தில் உண்மையை உணராமல் அரசியல் கட்சிகள் கருத்து தெரிவிப்பதாக கண்டனம் தெரிவித்துள்ள அமைச்சர் விஜயபாஸ்கர், நீதிமன்ற வழக்குகளால் செவிலியர்கள் பணி நியமனம் தாமதாகியுள்ளதாகவும் கூறினார்.