தமிழக அரசை தொடர்ந்து விமர்சித்து வரும் கமல்ஹாசன் மீது தமிழக அமைச்சர்கள் உள்ளிட்ட மூத்த தலைவர்கள் கடும் விமர்சனத்தை முன்வைத்து வருகின்றனர். இதனிடையே, நடிகர் கமல்ஹாசனை அமைச்சர்கள் மிரட்டுவது ஜனநாயகத்தின் அடிப்படை உரிமைகளை பறிக்கும் செயல் என்று திமுக செயல்தலைவர் மு.க.ஸ்டாலின் கண்டனம் தெரிவித்துள்ளார். எதிர்க்கட்சி தலைவர் மு.க.ஸ்டாலின் தமக்கு ஆதரவாக வெளியிட்டுள்ள அறிக்கைக்கு நடிகர் கமல்ஹாசன் நன்றி தெரிவித்துள்ளார். இது தொடர்பாக, டிவிட்டர் பக்கத்தில் அவர், அன்பு சகோதரர் ஸ்டாலினுக்கு நன்றி எனவும், நன்றி தவிர உடனே ஒன்றும் சொல்லத் தோன்றவில்லை எனவும் தெரிவித்துள்ளார். என் ஆதங்கங்களில் பல உங்கள் கோபச் செய்தியிலும் தெரிவதாகவும் கூறியுள்ள கமல்ஹாசன், ஒவ்வொரு வாக்காளனிலும் ஒரு தலைவன் இருக்கிறான், அதை உணர மறுப்பவர் தலைவர்களாக நீடிக்கும் கனவு ஜனநாயகத்தில் பலிக்காது என்றும் தெரிவித்துள்ளார்.