தொடரும் இலங்கை கடற்படை அட்டூழியம்.. மீண்டும் தமிழக மீனவர்கள் கைது

புதுக்கோட்டை மாவட்ட மீனவர்கள் 7 பேரை மீட்க நடவடிக்கை கோரி பிரதமருக்கு முதலமைச்சர் நேற்று கடிதம் எழுதியுள்ள நிலையில், இன்று தமிழக மீனவர்கள் 12 பேரை இலங்கை கடற்படையினர் மீண்டும் கைது செய்துள்ளனர்.

புதுக்கோட்டை மாவட்டம் கோட்டைப்பட்டினம் பகுதியைச் சேர்ந்த மீனவர்கள் 7 பேரை இலங்கை கடற்படை நேற்று சிறைபிடித்து சென்றது. மேலும் அவர்களின் 2 படகுகளையும் பறிமுதல் செய்தது. இதனையடுத்து தமிழக மீனவர்களை உடனடியாக விடுவிக்க நடவடிக்கை எடுக்க வேண்டும் பிரதமர் மோடிக்கு முதலமைச்சர் ஓ.பன்னிர்செல்வம் நேற்றே கடிதம் எழுதியிருந்தார்.

இந்நிலையில் இன்றும் எல்லை தாண்டி மீன்பிடித்ததாக கூறி தமிழக மீனவர்கள் 12 பேரை இலங்கை கடற்படை கைது செய்துள்ளது.

இலங்கை கடற்படையால் தமிழக மீனவர்கள் 22 பேர் ஏற்கனவே சிறைபிடிக்கப்பட்டுள்ளனர். இதேபோன்று 109 தமிழக மீனவர்களின் படகுகளையும் இலங்கை கடற்படையினர் பறிமுதல் செய்து வைத்தள்ளது குறிப்பிடத்தக்கது.