தவறு செய்யாத கிரிக்கெட் வீரர்கள் உண்டா? கேட்கிறார் பும்ரா

கிரிக்கெட்டில் தவறு செய்யாத வீரர்கள் யாரும் இல்லை என்று இந்திய கிரிக்கெட் அணியின் வேகப்பந்துவீச்சாளர் ஜஸ்பிரித் பும்ரா கூறினார்.

இந்திய கிரிக்கெட் அணி, தென்னாப்பிரிக்காவில் சுற்றுப்பயணம் செய்து கிரிக்கெட் விளையாடி வருகிறது. முதல் டெஸ்ட் போட்டியில் இந்திய அணி தோற்றது. இந்தப் போட்டியில் அறிமுக வீரராக களமிறங்கிய பும்ரா, இரண்டு இன்னிங்ஸிலும் சேர்த்து நான்கு விக்கெட்டுகளை வீழ்த்தினார். இந்நிலையில் இரண்டாவது டெஸ்ட் போட்டி செஞ்சுரியனில் நாளை நடக்கிறது. 

இதுபற்றி பும்ரா கூறும்போது, ’வெளிநாடுகளில் விளையாடுவது எப்போதுமே சவாலானதுதான். அங்குள்ள ஆடுகளமும் சீதோஷ்ண நிலையும் வித்தியாசமாக இருக்கும். அதனால் சவாலானது. அதிகமாக விளையாட விளையாடதான் அந்த நாட்டின் சூழ்நிலையையும் ஆடுகளத்தையும் கணிக்க முடியும். எந்த இடத்தில் பந்தை ’பிட்ச்’ செய்வது, எந்த ’லென்த்தி’ல் பந்துவீசுவது என்பதுபற்றி தெரிய வரும். தென்னாப்பிரிக்காவில் நான் இதற்கு முன் விளையாடியதில்லை. அதனால் சில தவறுகளை செய்திருக்கலாம். தவறு செய்யாத கிரிக்கெட் வீரர்கள் இருக்க முடியாது. அதில் இருந்து பாடம் கற்றுக்கொண்டு அடுத்தப் போட்டியில் வெற்றி பெறுவோம். மீண்டும் அதே தவறை செய்ய மாட்டோம். ஒரு போட்டியில் தோற்றுவிட்டதால் நம்பிக்கை இழந்துவிட மாட்டோம். ஒவ்வொரு முறையும் கற்றுக்கொண்டு அதில் இருந்து தவறுகளை திருத்திக்கொண்டும் முன்னேற வேண்டும். என் முதல் போட்டியில், முதல் டெஸ்ட் விக்கெட்டாக டிவில்லியர்ஸை வீழ்த்தியது மகிழ்ச்சியளிக்கிறது’ என்றார்.