ராஜீவ்காந்தி கொலைவழக்கில் நளினியை முன் கூட்டியே விடுவிக்க முடியாது என்று தமிழக அரசு தெரிவித்துள்ளது.

முன்னாள் பிரதமர் ராஜீவ் காந்தி படுகொலை வழக்கில் கடந்த 26 ஆண்டுகளுக்கு மேலாக நளினி சிறையில் உள்ளார். இந்தநிலையில், நல்லெண்ணத்தின் அடிப்படையில் தம்மை விடுதலை செய்ய தமிழக அரசுக்கு உத்தரவிட கோரி சென்னை உயர் நீதிமன்றத்தில் நளினி சார்பில் மனு தாக்கல் செய்யப்பட்டிருந்தது. இந்த மனுவிற்கு பதில் அளிக்கும்படி உள்துறை செயலாளருக்கு சென்னை உயர் நீதிமன்றம் உத்தரவிட்டது. 

இதைத் தொடர்ந்து, இன்று தமிழக அரசின் உள்துறை துணை செயலாளர் தேவாசீர்வாதம் ஆஜராகி, பதில் மனு தாக்கல் செய்தார். உச்சநீதிமன்றத்தில் வழக்கு நிலுவையில் உள்ளதால் விடுவிக்க முடியாது என தமிழக அரசு  சார்பில் விளக்கம் அளித்தார். 

நளினி இதே கோரிக்கையை வலியுறுத்தி கடந்த ஆண்டு தாக்கல் செய்த மனுவை, இதே காரணத்திற்காக தமிழக அரசு நிராகரித்து இருந்தது குறிப்பிடத்தக்கது.