விநோதமான முறையில் வேட்புமனுத் தாக்கல் செய்து கவனம் ஈர்த்த வேட்பாளர்கள்


மக்களின் மனங்களைக் கவர வாக்குறுதிகள் அளித்த காலம்போய், விநோதமான முறையில் வேட்பு மனுக்கள் தாக்கல் செய்து அனைவரின் கவனத்தை ஈர்த்துள்ளனர் வேட்பாளர்கள்.

பிறப்பால் உயர்வு, தாழ்வு இல்லை என்பதை நிரூபிக்கும் விதமாக தேனி நகராட்சியில் 16ஆவது வார்டில் போட்டியிடும் அதிமுக வேட்பாளர் ராகப்ரியா சின்னபாண்டி, திருநங்கைகள் புடைசூழ மனுத்தாக்கல் செய்தார்.

இதேபோல பிரதமரின் தூய்மை இந்தியா திட்டம் குறித்த விழிப்புணர்வை ஏற்படுத்தும் வகையில், வாளி மற்றும் துடைப்பத்துடன் மனுத்தாக்கல் செய்ய சென்றார் தேனி, பெரியகுளம் நகராட்சி வார்டில் போட்டியிடும் சேதுராமன். இவரை வழி மறித்த காவல்துறையினர், வாளி மற்றும் துடைப்பத்தை அனுமதிக்க மறுத்தனர். இதனால் அதனை காவல்துறை கட்டுப்பாட்டில் விட்டுவிட்டு மனுத்தாக்கல் செய்தார் சேதுராமன்.

இதுஒருபுறம் என்றால், மாட்டு வண்டியில் சென்று நெல்லையில் மனுத்தாக்கல் செய்திருக்கிறார் இந்து மக்கள் கட்சி வேட்பாளரான உடையார். இரு மாடுகளை பூட்டிக்கொண்டு பத்து பேரை அழைத்துக்கொண்டு அவர் சென்ற காட்சி ஊரையே திரும்பி பார்க்க வைத்தது. சென்னையில் பாரதிய ஜனதா சார்பில் சுப சித்ரா சதீஷ் என்ற பெண் வேட்பாளர் குதிரைகள் பூட்டிய சாரட் வண்டியில் வந்து மனுத்தாக்கல் செய்தார். ஊழலை ஒழிப்பதே தமது தாரக மந்திரம் என்று அவர் கூறினார். வேட்பாளர்களுக்கு இதுபோன்ற நுணுக்கங்கள் வெற்றியை கொடுக்குமா இல்லையா ? என்பதை தேர்தல் முடிவுகள்தான் பதிலை பெற்றுத்தரும்.

POST COMMENTS VIEW COMMENTS